די הערצער פון חסידי ביאלא זענען מלא התרגשות נאכן מיטלעבן רירנדע מאמענטן דורכאויס די היינטיגע טאג, אנגעהויבן מיט די היסטארישע מעמד ההכתרה און קיום בית צדיקים, דערנאך די מעמד עלי' לציון כ"ק אדמו"ר מביאלא זצ"ל, און שפעטער די ערשטע קבלת קהל ווען די חסידים האבן געהאט די געלעגנהייט צו דערלאנגען די ערשטע קוויטלעך בקודש פנימה ביים ממשיך שלשלת הקודש כ"ק אדמו"ר מביאלא שליט"א.
זיבן דרייסיג צופרי האט מען זיך געשטעלט דאווענען שחרית ברוב עם הדרת מלך אין ביהמ"ד הגדול ביאלא אין ירושלים, און נאכן דאווענען זענען די קינדער פון רבי'ן זצ"ל געזעסן שבעה א קורצע צייט, בעפאר די זקני וחשובי העדה האבן אויפגעשטעלט די אבלים און מען איז ארויס באגלייטן די נשמה כנהוג.
צום באשטימטן צייט האלב נאך צען פארמיטאג, איז די גאנצע ביהמ"ד שוין געווען איבערגעפולט מלא על כל גדותיו, די גאנצע היכל איז געווען צוגערישט מיט הונדערטער זיץ פלעצער, און הויכשטאקיגע פארענטשעס אויף ביידע זייטן ווי די פרחי החסידים האבן פארנומען זייערע פלעצער. פארנט פון ארון הקודש איז אויפגעשטעלט געווארן א ברייטע פלאטפארמע וואו עס זענען געזעצן אויסגעשורה'ט אלע קינדער פונעם רבי'ן זצ"ל, די פינף זיהן און צוויי איידימער, הגה"צ ר' שמחה ראבינאוויטש שליט"א בעל פסקי תשובות דיין אין די קהילה, א פלומעניק פונעם רבי'ן זצ"ל, און הגה"צ ר' יוסף באב"ד שליט"א מלפנים דומ"ץ בעלזא לאנדאן, א שוואגער מיטן רבי'ן זצ"ל.
בנו בכורו פונעם רבי'ן זצ"ל הגה"צ ר' חיים יודא לייבוש ראבינאוויטש שליט"א אב"ד שערי תורה אין מאנטשעסטער האט פארגעליינט די צוואה פונעם רבי'ן זצ"ל, און מיט רירנדע ווערטער אויסגערופן רצון קדשו פון זיין גרויסן פאטער, אז בנו חביבו הגה"צ ר' יצחק יוסף דוב שליט"א זאל איבערנעמען די הנהגה און ווייטער ממשיך זיין צו פירן די עדה הקדושה. דערביי האט הגה"צ ר' לייבוש שליט"א אויסגעפירט אז דאס איז אויך זיין אייגענע רצון, און די רצון פון די גאנצע משפחה, און מיר אלע שטייען צו די רעכטע האנט פונעם חשובן ברודער דער רבי שליט"א, און מיט די כח פון אחדות וועט ער האבן די זכיה צו משפיע זיין פאר אידישע קינדער, און ווייטער ממשיך זיין די הנהגה פון די אבות הקדושים בגנזי מרומים.
צום שלוס האט ער זיך הארציג באדאנקט פאר די געטרייע משמשים בקודש און מקורבים וואס האבן זיך אוועקגעגעבן פארן רבי'ן זצ"ל דורכאויס די אלע יארן, איבערהויפט אין די לעצטע תקופה ווען דער רבי איז ליידער געווען נישט געזונט. דערנאך האט ער געוואונטשן א ברכת מזל טוב פארן ברודער דער רבי שליט"א, ער זאל האבן גרויס מזל און ברכה והצלחה בכל מעשי ידיו, ויענו כל העם יחדיו אמן, מזל טוב!
דאן זענען צוויי זקני חסידים צוגעגאנגען צום רבי'ן און געגעבן די ערשטע קוויטל, דער רבי האט מעיין געווען דערין און געוואונטשן ברכת קדשו.
דערנאך האט מען געהערט קורצע דברות קודש פון כ"ק אדמו"ר מביאלא שליט"א, וועלכער האט ארומגערעדט איבער די שווערע אבידה, און די כח פון זכות אבות, דער רבי האט געזאגט אז מ'גייט אצינד מתפלל זיין ביים ציון הק' פונעם רבי'ן זצ"ל, בעט מען ער זאל זיין א מליץ יושר און משפיע זיין פון אויבן, מ'זאל קענען ממשיך זיין זיינע דרכים און קעגן גיין משיח צדקינו במהרה בימינו אמן.
דערנאך איז פארגעקומען א סיום משניות וואס איז געלערנט געווארן דורך די חסידים אינאיינעם, הגה"צ ר' דוד מאניש ראבינאוויטש שליט"א דער צווייטער זון פון רבי'ן זצ"ל האט מסיים געווען, און דערנאך האבן אלע ברידער געזאגט קדיש. דאן האט דער רבי געטרינקען לחיים און געוואונטשן פארן גאנצן ציבור. מען האט געזינגען קה זכות אבות יגן עלינו, און כי אורך ימים ושנות חיים.
דערנאך איז דער גאנצער ציבור אינאיינעם ארויף צום ציון הק' אויפן הר הזיתים ככלות השבעה כנהוג, און שפעטער נאכמיטאג איז פארגעקומען זמני קבלת קהל, וואו די ציבור חסידים זענען אריין מיט די ערשטע קוויטלעך און מקבל מרות זיין.
למען יאריך ימים על ממלכתו, הוא ובניו בקרב ישראל.
