זונטאג קרח 4:40 נאכמיטאג
די קינדער פון כ"ק אדמו"ר מקאסוב זצ"ל קומען אן אצינד אין שטוב פון הנגיד החסיד ר' איסר ראטה הי"ו אין מאנסי, דארט וואו זייער פאטער דער רבי זצ"ל האט לאנגע יארן געהאט די אכסניא וויילנדיג אין מאנסי, אין די קומענדיגע שעה זענען ערווארטעט אנצוקומען אויף ניחום אבלים כ"ק אדמו"ר מסקווירא שליט"א, כ"ק אדמו"ר מוויזניץ שליט"א פון ארה"ק, און כ"ק אדמו"ר מוויזניץ שליט"א פון קייאמישע.
זונטאג קרח 4:15 נאכמיטאג
הרה"ג ר' יחיאל שטיינמעטץ שליט"א מרבני קהילה קדושה וויזניץ האט יעצט פארגעזאגט צידוק הדין, די קינדער האדמורי"ם והרבנים זאגן יעצט קדיש, און דערנאך וועט מען מנחם אבל זיין צווישן די שורות.
זונטאג קרח 4:10 נאכמיטאג
יעצט האט מען געענדיגט סתימת הגולל אויפן וויזניצע בית החיים, צווישן אנדערע זעהן זיך אן כ"ק אדמו"ר מוויזניץ שליט"א פון בארא פארק, כ"ק אדמו"ר מבית יצחק ספינקא שליט"א, כ"ק אדמו"ר מאוסטראה שליט"א, הגה"צ אב"ד אשוואר שליט"א, און כ"ק אדמו"ר מצאנז קרית יואל שליט"א.
זונטאג קרח 3:45 נאכמיטאג
צוליב די שלאקס רעגן וואס האט זיך אראפגעלאזט האט מען צוגעווארט מיט די מיטה אין קאר, יעצט נעמט מען ארויס די מיטה און מען הייבט אן ארויפגיין די בארג ביז צום מקום הקבורה. אויפן פלאץ זעהן זיך אן כ"ק אדמו"ר מוויזניץ שליט"א פון ארה"ק, כ"ק אדמו"ר מוויזניץ שליט"א פון מאנסי, און כ"ק אדמו"ר מוויזניץ שליט"א פון קייאמישע.
זונטאג קרח 3:30 נאכמיטאג
די מיטה איז נארוואס אנגעקומען אויפן וויזניצע בית החיים אין מאנסי, א שלאקס רעגן גייט מיט א שטארקייט, און טראצדעם שטייען הונדערטער אידן פארזאמלט צו באוויינען די שרעקליכע אבידה.
זונטאג קרח 3:25 נאכמיטאג
זונטאג קרח 3:20 נאכמיטאג
טראץ די שווערע רעגן וואס הייבט זיך אן אראפצולאזן העכער די טויזענטער משתתפים ביי די גרויסע לוויה אין מאנסי, טוען די מאסן אידן ווייטער באגלייטן צופיס לחלוק כבוד האחרון פארן געטרייען מנהיג און צדיק וקדוש, אין די קומענדיגע מינוטן קומט די מיטה אן צום בית החיים, וואו מען וועט אנהייבן די מעמד הקבורה ביים חלקת מחוקק ספון, נעבן זיין גרויסן פאטער דער קאסוב זאליטשיקער רבי זצ"ל, הארט נעבן מקום מנוחת הקודש פון הרה"ק מריבניץ זי"ע.
צווישן די פילע באגלייטער זעהט זיך אן כ"ק אדמו"ר מסקולען מאנסי שליט"א, כ"ק אדמו"ר מסקולען ירושלים שליט"א, כ"ק אדמו"ר מסטאניסלאוו שליט"א, כ"ק אדמו"ר מסקווירא מאנסי שליט"א, און הגה"צ גאב"ד טאהש מאנסי שליט"א.
זונטאג קרח 2:55 נאכמיטאג
די מיטה קומט יעצט אן אויף רוט 306 וואו טויזענטער אידן באגלייטן די מיטה צופיס, וואס ווערט געפירט דורך די נושאי הארון און פילע באגלייטער, פילע באסעס פון כתר ווילעדזש שאטל סערוויס שטייען גרייט ביים ווינקל פון פיליס טערעס און 306, צו פירן די הונדערטער מלווים ביז צום וויזניצע בית החיים.
זונטאג קרח 2:50 נאכמיטאג
אנקומענדיג פארנט פון ביהמ"ד הגדול וויזניץ האט מען געעפנט די קאר, הרה"ג ר' יחיאל שטיינמעטץ שליט"א מרבני הקהילה האט פארגעזאגט קל מלא רחמים בהתעוררות רב, און אצינד הייבט מען אן באגלייטן ארויף די בארג, במקהלות אלפי ישראל חסידים ואנשי מעשה.
זונטאג קרח 2:35 נאכמיטאג
די מיטה איז נארוואס אנגעקומען ברחבת ביהמ"ד הגדול אין שיכון וויזניץ מאנסי, כ"ק האדמורי"ם מוויזניץ פון ארה"ק און מאנסי קומען יעצט ארויס בראש המלווים, אזוי אויך זעהט זיך אן כ"ק אדמו"ר מסקולען לעיקוואד שליט"א.
זונטאג קרח 2:05 נאכמיטאג
טויזענטער אידן זענען שוין פארזאמלט ביים וויזניצער ביהמ"ד אין מאנסי, אזוי אויך די הונדערטער בחורי הישיבות דחסידי וויזניץ וועלכע זענען אריינגעקומען קיין מאנסי אפצוגעבן דעם כבוד האחרון פארן קאסובער רבי'ן זצ"ל נצר לשלשלת בית קאסוב וויזניץ און לאנגיעריגער דיין ומורה צדק אין די וויזניצע קהילה אין בארא פארק.
אויפן פלאץ זעהן זיך אן צווישן אנדערע כ"ק אדמו"ר מגאלאנטא שליט"א א מחותן מיטן רבי'ן זצ"ל, כ"ק אדמו"ר מסערט וויזניץ ארה"ב, הגה"צ אבד"ק סאלקא,הגה"צ אבד"ק ביסטריץ, און הגה"צ אב"ד מאדא שליט"א.
זונטאג קרח 2:00 נאכמיטאג
זונטאג קרח 1:50 נאכמיטאג
די מיטה איז נארוואס אנגעקומען פארנט פון ישיבה אור ודעת אויף טשעסנאט רידזש, וואו עס האבן אפגעווארט כ"ק אדמו"ר מסקווירא שליט"א, כ"ק אדמו"ר מסאטמאר שליט"א, און כ"ק אדמו"ר מראחמיסטריווקא מאנסי שליט"א. הרב דוד בערגער שליט"א משב"ק כ"ק אדמו"ר מסקווירא שליט"א האט געזאגט קל מלא רחמים, און אצינד באגלייטן דארט פילע אידן אין שפיץ פון די רבי'ס א שטיק וועג.
הונדערטער אידן זענען שוין פארזאמלט פארנט פון ביהמ"ד הגדול אין שיכון וויזניץ מאנסי, די מיטה איז ערווארטעט אנצוקומען אין די קומענדיגע מינוטן.
זונטאג קרח 1:30 נאכמיטאג
כ"ק אדמו"ר מסקווירא שליט"א קומט יעצט אן צום ישיבה אור ודעת אויף טשעסנאט רידזש בגלילות מאנסי, וואו דער רבי שליט"א וועט אפווארטן די מיטה פון כ"ק אדמו"ר הרה"ק מקאסוב זצ"ל און באגלייטן א שטיק וועג.
כ"ק אדמו"ר מוויזניץ שליט"א וועלכער איז צוגאסט די טעג אין ניו יארק, איז נארוואס אנגעקומען קיין שיכון וויזניץ מאנסי לביתו נאוה קודש פון ש"ב כ"ק אדמו"ר מוויזניץ שליט"א פון מאנסי, דער רבי וועט דארט ציווארטן ביז די מיטה קומט אן פארנט פון ביהמ"ד און באגלייטן בראש המלווים.
זונטאג קרח 1:00 מיטאג
ווי עס הייסט יעצט וועט די מיטה אנקומען פארנט פון ביהמ"ד הגדול וויזניץ צוויי אזייגער מיטאג, מען וועט ארויסנעמען די מיטה און זאגן קל מלא רחמים, און דאן ארויפבאגלייטן צופיס ביז די בית החיים.
אין מאנסי ווערן געמאכט די לעצטע הכנות צו די גרויסע לוויה פון כ"ק אדמו"ר מקאסוב זצ"ל, פיליס טערעס איז שוין אפגעשלאסן, און רוט 306 וועט ווערן אפגעשטעלט צוביסלעכווייז, אין די צייט וואס מען וועט באגלייטן די מיטה דעם לאנגן וועג ביז די וויזניצע בית החיים.
זונטאג קרח 12:30 מיטאג
אלופי אלפי ישראל צושפרייטן זיך אצינד נאך די גרויסע לוויה ברחובות העיר בארא פארק, מען האט באגלייט די מיטה אראפ די פינף און פופציגסטע סטריט ביז די צוועלפטע עוועניו, און אצינד איז די מיטה אונטערוועגנס קיין מאנסי, אזוי אויך איז צוגעשטעלט פילע באסעס צו פירן די הונדערטער מלווים צו די לוויה אין מאנסי.
צווישן אנדערע האט זיך אנגעזעהן כ"ק האדמורי"ם מקאסאן, סקווירא ב"פ, וויען פלעטבוש, אב"ד אמונת ישראל, אב"ד קאמאדא, אב"ד שאפראן, הגה"צ ר' חיים מאיר האגער בן האדמו"ר מוויזניץ, און נאך פילע רבנים ואנשים חשובים.
זונטאג קרח 12:14 מיטאג
די מיטה איז יעצט ארויסגעברענגט געווארן פון ביהמ"ד, און טויזענטער אידן באגלייטן אויפן גאס אין ריכטונג פון די דרייצנטע עוועניו. צווישן אנדערע זעהט זיך אן כ"ק האדמורי"ם מצאנז קלויזענבורג, מונקאטש, לעלוב, בורשטין, סטוטשין, זידטשויב, דאמבראווא, הגה"צ ר' אהרן שיף גאב"ד אנטווערפן, און הגה"צ ר' בנימין אייזענבערגער אב"ד היכל התפילה.
זונטאג קרח 12:05 מיטאג
צווישן די פילע אדמורי"ם ורבנים זעהט זיך אן כ"ק אדמו"ר מסאטמאר, כ"ק אדמו"ר מבאבוב 45, האדמורי"ם מוויזניץ פון וויליאמסבורג, ירושלים און בארא פארק, כ"ק אדמו"ר מתולדות יהודה סטוטשין, הגה"צ אבד"ק היבנוב, הגה"צ אבד"ק ברעזאן, און הגה"צ אבד"ק סאדאוונא.
זונטאג קרח 12:00 מיטאג
הרה"ח ר' מענדיל ראזענבערג הי"ו יו"ר החברא קדישא האט יעצט פארגעזאגט קל מלא רחמים, די קינדער האדמורי"ם והרבנים רייסן אצינד קריעה, און מען האט אויסגערופן אז אלע תלמידים וחסידים זאלן רייסן קריעה אויף די רעכטע זייט פונעם בגד.
זונטאג קרח 11:57 פארמיטאג
כ"ק אדמו"ר מקאסוב הרה"צ רבי יעקב שמשון האגער שליט"א איז ווייטער ממשיך מיט רירנדע דברי פרידה, אצינד האט ער געבעטן אז די יונגערע ברידער זאלן אויך ממשיך זיין די כתר ההנהגה, הגה"צ ר' משה האגער שליט"א אלס מנהיג אין וויליאמסבורג, און הגה"צ ר' ברוך האגער שליט"א אלס מנהיג אין לעיקוואד.
זונטאג קרח 11:52 פארמיטאג
כ"ק אדמו"ר מקאסוב הרה"צ רבי יעקב שמשון האגער שליט"א האט יעצט אויסגערופן רירנדע ווערטער, אז ער בעט זיין יונגערער ברודער כ"ק אדמו"ר מקאסוב הרה"צ רבי מנחם מענדיל דוד שליט"א זאל קומען קיין אמעריקע איבערנעמען די כתר האדמורו"ת, און ווייטער ממשיך זיין די הייליגע המשכה לבית קאסוב.
זונטאג קרח 11:44 פארמיטאג
כ"ק אדמו"ר מקאסוב הרה"צ רבי יעקב שמשון האגער שליט"א טרעט יעצט אויף מיט געשטיקטע טרערן זיך צו געזעגענען פון אביו הגדול דער רבי זצ"ל.
זונטאג קרח 11:40 פארמיטאג
יעצט טרעט אויף דער לאנגיעריגער ראש הקהל אין קהילה קדושה קאסוב הנגיד החסיד ר' שלמה זלמן קליין הי"ו איש אמונו פונעם רבי'ן זצ"ל, אויפן רבינ'ס בקשה איז ער מכתיר די צוויי עלטסטע קינדער אלס ממשיכי דרכו בקודש, בנו הגדול הגה"צ ר' יעקב שמשון האגער שליט"א אלס אדמו"ר מקאסוב אין בארא פארק, און דער צווייטער זון הגה"צ ר' מנחם מענדיל דוד האגער שליט"א (איידעם ביי כ"ק אדמו"ר מסערט וויזניץ שליט"א) אלס אדמו"ר מקאסוב אין ארץ ישראל.
זונטאג קרח 11:35 פארמיטאג
צווישן אנדערע זעהט זיך אן כ"ק האדמורי"ם מסקולען, ראחמיסטריווקא, ספינקא, דינוב, הגה"צ אבד"ק באבוב 45, אב"ד שעדליץ, אב"ד אמרי יהודה ברעזאן, און הגה"צ ר' נחום טווערסקי שליט"א איידעם ביי הרה"ק מראחמיסטריווקא זי"ע.
זונטאג קרח 11:30 פארמיטאג
דרכי ציון אבילות, אין ביהמ"ד הגדול דקהל תורת חיים וויזניץ אין ירושלים זענען פארזאמלט פילע אידן און האלטן מיט די לוויה דורכ'ן טעלעפאן, באותו מקום וואו דער רבי זצ"ל האט צענדליגע שבתים געפראוועט בעבודת קדשו מיט אויסטערלישע געגועים צום מקום הקודש והמקדש, אין די זוממער וואכן מדי שנה בשנה.
זונטאג קרח 11:25 פארמיטאג
הימל שפאלטענדע בכיות טוט איבערנעמען די גאנצע חלל הביהמ"ד און די גאסן ארום, ווען דעם רבינ'ס ברודער הגה"צ אבד"ק זאליטשיק שליט"א שרייט אויס "כ'זוך די עוונות און כ'טרעף עס נישט", מ'האט יעצט געזאגט די נוסח פון הקפות וואו מ'בעט דעם אויבערשטן ער זאל מכפר זיין אויף די עוונות פונעם נפטר, כ'גיי ארום די מיטה און כ'זוך די עוונות! נאר זכותים טרעפט מען, אהבה וחיבה צו יעדע אידיש קינד, און התמדה בתורה שעות אויף שעות.
זונטאג קרח 11:20 פארמיטאג
הגה"צ ר' חיים האגער שליט"א אבד"ק זאליטשיק איינציגער ברודער פונעם רבי'ן זצ"ל, טרעט יעצט אויף מיט רירנדע דברי פרידה לפני מיטתו פון אחיו הגדול דער רבי זכר צדיק לברכה.
זונטאג קרח 11:15 פארמיטאג
כ"ק אדמו"ר מבאבוב שליט"א איז נארוואס אנגעקומען צו די מסע הלוויה אין קאסובער ביהמ"ד אין בארא פארק, מען איז ממשיך די הקפות מיט יאמערליכע געוויינען און שטורמישע בכיות.
זונטאג קרח 11:05 פארמיטאג
אין די יעצטיגע מינוטן ווערט אפגעראכטן די הקפות כנהוג דורך די חשובי העדה אדמורי"ם און רבנים, פארגעזאגט דורך הרה"ח ר' מענדיל ראזענבערג הי"ו יו"ר החברא קדישא און חסד של אמת, באגלייט מיט יאמערליכע בכיות דורך די הונדערטער פארזאמלטע אין ביהמ"ד און די טויזענטער אויף די גאסן ארום.
זונטאג קרח 10:55 פארמיטאג
די מיטה געפונט זיך שוין אין די היכל ביהמ"ד דחסידי קאסוב, הונדערטער אידן זענען פארזאמלט מיט פארוויינטע אויגן און זאגן פרקי תהלים בהתעוררות רב.
זונטאג קרח 10:40 פארמיטאג
אין די יעצטיגע מינוטן איז די מיטה געווארן אדורכגעפירט ביהמ"ד קאסוב זאליטשיק אויף די צוויי און פופציגסטע סטריט, מען האט נישט אריינגענומען די מיטה אינעווייניג, נאר פארנט פון ביהמ"ד האט הרה"ח ר' מענדיל ראזענבערג הי"ו יו"ר החברא קדישא און חסד של אמת פארגעזאגט קל מלא רחמים.
זונטאג קרח 10:30 פארמיטאג
די מיטה פון כ"ק אדמו"ר מקאסוב זצ"ל קומט יעצט אן צום ביהמ"ד קאסוב זאליטשיק אויף די צוויי און פופציגסטע סטריט צווישן די עלפטע און צוועלפטע עוועניוס, דארט וואו דער רבי זצ"ל האט געפראוועט די עבודת הקודש בשנים קדמוניות, בבית מדרשו של אביו הרה"ק רבי אברהם יהושע העשיל מקאסוב זאליטשיק זצ"ל.
מטעם קהילה קדושה קאסוב איז געמאלדן געווארן, אז צוליב מאנגל אין פלאץ בהיכל ביהמ"ד הגדול והחדש דקהל קאסוב בשעת די מסע הלוויה, וועלן אריינגעלאזט ווערן בלויז מתפללים קבועים און חברי הקהילה פון קאסובער בית המדרש, אין צוגאב צו אדמורי"ם ורבנים וואס וועלן אפרעכטן די הקפות כנהוג.
זונטאג קרח 10:00 פארמיטאג
אין די פריערדיגע מינוטן האט מען געענדיגט די טהרה אין די מקוה פון וויזניצע בית המדרש וואו דער רבי זצ"ל האט משמש געווען אלס דיין לאנגע יארן, די מיטה געפונט זיך אצינד אקעגן איבער בביתו נאוה קודש פונעם רבי'ן זצ"ל, אין די ספרים שטוב צווישן די פיר ווענט וואו דער רבי האט עוסק געווען בתורה והוראה רבות בשנים, משם יצא הוראה לישראל, פון דארט האבן טויזענטער אידן געשעפט חיזוק ברוחניות ובגשמיות, אין די ד' אמות של הלכה וואו טויזענטער שאלות זענען גע'פסק'נט געווארן ביי דעם גדול הדור.
זונטאג 5:00 פארטאגס
האדמו"ר מוויזניץ פון ירושלים ווערט געזען זאגן תהלים ביים מטה אין ביהמ"ד קאסוב.
מוצאי שבת קודש 12:10
די מיטה פון כ"ק אדמו"ר מקאסוב זצוק"ל איז נארוואס אריינגעברענגט געווארן בהיכל בית מדרשו, יאמערליכע בכיות הערט זיך אויפן ארט פון די פילע פארזאמלטע וואס קענען נישט גלייבן אז דאס ארגסטע האט ליידער פאסירט. דורכאויס די נאכט וועלן ווייטער פארקומען משמורות תהלים, ביז 8:30 אינדערפרי וועט מען וועט ארויספירן די מיטה צו די טהרה אין וויזניצע בית המדרש.
מוצאי שבת קודש 12:05
צוליב די ריזן ערווארטעטע ציבור וועט די גרויסע לוויה פארקומען בהיכל בית המדרש הגדול והחדש דחסידי קאסוב, די בית המדרש וואס דער רבי זצ"ל האט אונטערגענומען צו בויען, אבער האט ליידער נישט זוכה געווען עס צו באנייען, די ריזן היכל ווערט אצינד צוגעגרייט דורך מערערע עסקנים צו קענען ארייננעמען טויזענטער אידן, דורכאויס די נאכט וועט די מיטה יא זיין אינעם אלטן בית המדרש, דארט וואו דער רבי האט אפגעראכטן עבודת קדשו לאנגע יארן.
מוצאי שבת קודש 11:45
ארום עלף אזייגער איז די מיטה ארויסגעפירט געווארן פון די קארנעל שפיטאל אין מאנהעטן, וואו דער רבי זצ"ל האט זיך געפונען די לעצטע צוויי וואכן און דארט צוריקגעגעבן נשמתו הזכה ליוצרה ובוראה, די מיטה איז ערווארטעט צו ווערן אריינגעברענגט באלד בהיכל בית מדרשו של רבי אין די קאסובער בית המדרש אויף 55, וואו הונדערטער אידן זענען שוין פארזאמלט, זאגן פרקי תהלים און טרויערן אויף דעם שרעקליכן בראך.
האלב נאך אכט צופרי וועט די חברה קדישא אפרעכטן די טהרה אין די מקוה בבנין ביהמ"ד הגדול דקהל תורת חיים וויזניץ אויף נוא יוטרעקט ביי דריי און פופציג, דארט וואו דער רבי זצ"ל האט משמש געווען אלס דיין און מורה צדק העכער דרייסיג יאר כולן שוין לטובה. נאך די טהרה וועט מען אריבערפירן די מיטה אקעגן איבער די גאס לביתו נאוה קודש פונעם רבי'ן זצ"ל וואו די בני המשפחה וועלן זיך געזעגענען, און דערנאך ארום 10:45 וועט זיך אנהייבן די גרויסע לוויה אין קאסובער בית המדרש.
פילע גאסן וועלן פארשפארט ווערן צוליב די לוויה, אנגעהויבן פון די פינף און פופציגסטע סטריט צווישן די דרייצנטע און פערצנטע עוועניו וואו עס געפונט זיך די קאסובע ביהמ"ד, און איז שוין יעצט אפגעשלאסן פאר פארקער.
אין מאנסי וועט אפגעשפארט ווערן פיליס טערעס אין די צייט פון די לוויה, און דערנאך וועט מען אפשליסן רוט 306 אין די צייט וואס טויזענטער אידן וועלן באגלייטן די מיטה בדרכו האחרונה ביז צום וויזניצע בית החיים.
מוצאי שבת קודש 10:15
לויטן יעצטיגן פלאן וועט די גרויסע לוויה פון כ"ק אדמו"ר הרה"ק מקאסוב זצוק"ל פארקומען מארגן זונטאג פארמיטאג, 11:00 וועט זיך אנהייבן די גרויסע לוויה בהיכל בית מדרשו של רבי אין קאסובער ביהמ"ד אויף די 55'סטע סטריט, דארט וואו דער רבי זצ"ל האט אפגעראכטן די עבודת הקודש בשלהבת אש קודש.
ארום 1:00 וועט די מיטה אנקומען קיין מאנסי צום גרויסן ביהמ"ד אין שיכון וויזניץ מאנסי, פון דארט וועט מען באגלייט צופיס די גאנצע וועג ביז די וויזניצע בית החיים אויף 306, וואו דער רבי זצ"ל וועט געברענגט ווערן למנוחת עולמים, צווישן מקום מנוחת קדשו פון הרה"ק מריבניץ זי"ע, און זיין פאטער כ"ק אדמו"ר מקאסוב זאליטשיק זצ"ל.
וכל בית ישראל יבכו את השריפה אשר שרף ה'.
