א ריזן ציבור אידן האבן זיך פארזאמלט נעכטן זונטאג אין די פריע נאכמיטאג שעה'ן אפצוגעבן דעם כבוד האחרון ביי די גרויסע לוויה פון הגה"צ ר' שמעי' גרינבוים זצ"ל בעל מח"ס סייעתא דשמיא, וואס איז פארגעקומען ארום צוויי אזייגער נאכמיטאג אין היכל בית המדרש הגדול אין די סאטמארע באנגעלא קאלאניע מחנה לפידות אין ווייט לעיק, דארט וואו דער גרויסער נפטר זצ"ל האט פארבראכט לאנגע יארן אין די זוממער חדשים, און משפיע געווען מהוד תורתו וצדקתו אויף יעדן ארום.
עס האבן אויפגעטרעטן מיט דברי הספד הגה"צ ר' ישראל דוד הארפענעס שליט"א מח"ס ישראל והזמנים, הגה"צ ר' חיים הערש טייטלבוים שליט"א אבד"ק סאטמאר ירושלים, הגה"צ גאב"ד יאוואזשנא שליט"א, הרה"ג ר' שמואל שלעזינגער שליט"א בן הגה"צ ר"י הרמה לאנדאן שליט"א, און דערנאך האט מען געהערט דברי הספד בקול בוכים פון כ"ק אדמו"ר מסאטמאר שליט"א וועלכער האט באוויינט די שרעקליכע אבידה פאר גאנץ סאטמאר בכלל, מיטן פטירה פון דעם גרויסן גאון, וואס איז געווען א דולה ומשקה לאחרים מתורת רבו הגדול הרה"ק מסאטמאר זי"ע.
דערנאך האט מספיד געווען הגה"צ ר' ישראל ארי' מרגליות שליט"א איידעם פונעם גאון זצ"ל, און דערנאך דער איידעם הגה"צ גאב"ד קראסנא שליט"א, וועלכער האט מספיד געווען פארנט פון ביהמ"ד זייענדיג א כהן, דאן האט מען באגלייט די מיטה א שטיק וועג ביז צום הויפט גאס, וואו די מיטה איז אפגעפירט געווארן לקבורה קיין קרית יואל.
ביי די לוויה אין ווייט לעיק האבן זיך אנגעזעהן צווישן אנדערע כ"ק אדמו"ר מבאבוב שליט"א א נאנטער ידיד מיטן גאון זצ"ל, כ"ק אדמו"ר מתולעת יעקב, הגה"צ אבד"ק אלכסנדר, אב"ד שאפראן, אב"ד קאלוב ב"פ, אב"ד קראלי מאנסי, און הגה"צ דומ"ץ סאטמאר ב"פ שליט"א.
