א העלישע פייער האט אויסגעבראכן די נאכט אין מחנה נווה שלום קאסאן אין פאולסבורג, די פייער האט זיך אנגעהויבן ביי די גרויסע פיר שטאקעדיגע געביידע וואס געפונט זיך הארט נעבן די בית המדרש פון די קאנטרי, און די עס זאל פון די קאנטרי איז סטאנציאנירט אין די אונטערשטע שטאק פון די גרויסע געביידע.
כ"ק אדמו"ר מקאסאן שליט"א און אזוי אויך די אנדערע תושבי המחנה, זענען שוין מער ווייניגער אהיימגעפארן פאר שבת, און דעריבער האט זיך נישט געפונען קיין גרויסע ציבור אויפן ארט בשעת די שריפה. עס איז נישט קלאר וויאזוי די פייער האט זיך אנגעהויבן, אבער עס האט זייער שנעל איינגענומען די גאנצע געביידע, און זיך אפילו אריבערגעכאפט צו א דערנעבענדיגע געביידע וואס האט געדינט אלס א קלענערע שוהל.
פייערלעשער זענען אלארמירט געווארן אינמיטן די נאכט, און האבן נאכאנאנד גערופן פאר הילף פון דערנעבענדיגע פייער קאמפאניס. עס האט געדויערט א שיינע פאר שעה ביז די פייער איז געברענגט געווארן אונטער קאנטראל, ווען א טייל פון די גרויסע געביידע איז שוין געווען איינגעפאלן צוליב די פייער.
די ספרי תורה זענען ב"ה באצייטנס ארויסגעראטעוועט געווארן, און בחסדי ה' איז קיינער נישט געשעדיגט געווארן.
