ספעציעלער מעמד "לשנה טובה ומתוקה" ווען כ"ק אדמו"ר מרחמסטריווקא שליט"א וואונטשט אן די חשובע מנהלי מוסדות "בית לפליטות" און אלע אירע אפטיילונגען, בזכות די מסירת נפש'דיגע פעולות יומם ולילה לא ישבותו – און בענטשט "עפל און האניג" צו ווערן פארטיילט לכבוד ראש השנה הבעל"ט – העלדישע תלמידות היקרות פונעם הייליגן מוסד בתוככי בירושלים עיה"ק ווי אויך פונעם 'ביחד' און 'בשבילך' ארגענזאציעס פאר קינדער פון צוטיילטע שטיבער קוקן ארויס אויף "תכלה שנה וקללותי' תחל שנה וברכותי'" – דראמאטישע הארצרייסנדע געשיכטעס עפענען טרערן און הערצער פון אחינו בני ישראל ארום די וועלט לטובת דעם הייליגן רעטונג מוסד
ירושלים עיר הקודש. – עס איז די צייט פון יאר, די הייליגע טעג זענען שוין דא, מען שפירט די לופט איז געהויבן, די אטמאספערע איז הייליג און טייער, שטייענדיג פאר די ימי הרת עולם, דער הייליגער יום טוב ראש השנה הבאה עלינו לטובה...!
אינערהאלב די ווענט פון "בית לפליטות" איז די שטימונג העכסט שפאנענד, ווען די חשובע תלמידות היקרות, די טעכטער פונעם אויסגערימטן רעטונג מוסד וואו די מיידלעך טרעפן א ווארימע היים, גרייטן זיך מקבל צו זיין די הייליגע טעג מיט אומבאשרייבליכע תפילות ותחנונים, אבינו מלכינו חמול עלינו, עס זאל שוין מקוים ווערן "תכלה שנה וקללותי' – תחל שנה וברכותי'...!",
די מיידלעך פון "בית לפליטות" האבן ליידער אנגעזאמלט אסאך טרערן צו פארגיסן בימי הרחמים והסליחות, זה בכה וזה בכה, יעדע מיט די אייגנארטיגע געשיכטע וואס האט צוגעפירט צו באקומען די געטריישאפט און ווארימקייט פונעם הייליגן מוסד און דארט באקומען די היים וואס זיי האבן נישט. ווערטער קענען נישט גענוג שילדערן די מיטמאכענישן וואס רוב פון די חשובע מיידלעך זענען אדורך ביז'ן דערגרייכן די טויערן פון זייערע נייע ווארימע היים, וואו עס עפענט זיך פאר זיי א טויער פון האפענונג, א טויער פון ליכטיגקייט, א טויער פון א נייע פרייליכע גליקליכע צוקונפט בס"ד.
ווי אויך די קינדער און בחורים פונעם 'ביחד' ארגעניזאציע, אינעם זעלבן פארעם דער 'בשבילך' ארגעניזאציע פאר די מיידלעך, פון צוטיילטע שטיבער, וואס איז געשטעלט געווארן דורך די הנהלת המוסדות, זיי צו געבן כוח און חיזוק און זייער ווייטאג'ליכן לעבנ'ס געשטיכטע, ווי אויך זיי געבן א ווארעמע היים ווי זיי שעפן זיך אהן מיט פרישע לופט און כוח צו מארגנדיגן טאג,
יעצט אז מען גרייט זיך צו די הייליגע טעג, זענען די ערווארטונגען אינערהאלב די מוסדות גאר גרויס, וויבאלד עס ווערט אראנדזשירט צו פראווענען דעם גאנצן יום טוב ראש השנה, ווי אין יעדע לעכטיגע אידישע שטוב, אין שפיץ פון די חשובע ראשי המוסדות שליט"א, די טאטעס און מאמעס פון די טייערע קינדער, מיט די תפילות, תקיעות, סעודות, און געהויבענע אטמאספערע כי קדוש היום לאדונינו...!
*
אין די ימי הסליחות, האט זיך אפיציעל אנגעהויבן די צוגרייטונגען צום "ראש השנה אין בית לפליטות," ווען די ראשי המוסד שליט"א זענען אריין לקודש פנימה צו כ"ק מרן אדמו"ר מרחמסטריווקא שליט"א להתברך בכתיבה וחתימה טובה און א גוט געבענטשט יאר – אבער די הויפט ווענדונג פונעם מעמד רם נשגב איז געווען געוואנדן לטובת די חשובע תלמידי המוסדות
מנהל המוסדות הרה"ח בעל מסי"נ הרב משה יונה ראזנפעלד שליט"א ובנו המנכ"ל הרב חיים אלעזר שליט"א, האבן איבערגעגעבן פאר כ"ק מרן האדמו"ר שליט"א א פולשטענדיגער באריכט איבער די יעצטיגע פעולות המוסדות און אלע אירע אפטיילונגען, צווישן זיי אויסטערלישע הילף אקציעס וואס לא יאומן כי יסופר, וואו מען האט ממש געראטעוועט דורות שלימים און אויפגעראכטן אידישע הייזער במלוא מובן המלה.
באזונדער האט כ"ק האדמו"ר שליט"א אויסגעדרוקט געוואלדיגע התפעלות אויף דעם וואס דער מוסד הקדוש איז אין פולסטן פונקציע לקראת ימי ראש השנה הבעל"ט, מיט אלע צוגעהערן ברוחניות וגשמיות, אנגעפירט דורך די געטרייע שטאב מיטגלידער וואס געבן זיך איבער מיט הארץ און נשמה פאר די טייערע קינדערלעך. כ"ק האדמו"ר שליט"א האט זיך פערזענליך אינטערעסירט ביים מנהל שליט"א איבער די מנהגים וואס זענען נתקבל בכל תפוצות ישראל ביי די סעודות פון ליל ראש השנה, און וועלן דעם יו"ט אויך געפראוועט ווערן דא אין מוסדות "בית לפליטות." דערויף האט דער כ"ק האדמו"ר שליט"א מאציל געווען מברכותיו הטהורים פאר די מנהלי וצוות המוסדות, און גאר ווארים אנגעוואונטשן אויף די געוואלדיגע זכי' וואס זיי האבן אנצופירן די ווירטשאפט, ספעציעל אין די הייליגע יום טוב טעג, אויפ'ן ריכטיגן געהויבענעם שטייגער ווי יעדע אידישע שטוב. כ"ק האדמו"ר שליט"א האט דערביי אויך געבענטשט די "עפל און האניג" וואס מען האט צוגעברענגט על שולחן מלכים פון די צוגרייטונגען לכבוד יום טוב כנהוג. און פארטיילט ווערן פאר אלע אירע אפטיילונגען
די חשובע ראשי המוסדות שליט"א זענען ארויס מביתו נאוה קודש מחוזק ומאומץ ביז גאר צו קענען אנגיין און ממשיך זיין די עבודת הקודש צו ראטעווען און מחי' זיין די חשובע תלמידות שתחיו על טהרת הקודש לשם ולתפארת.
*
אינערהאלב דעם הייליגן מוסדות, ווען די מיידלעך שתחיו האבן איבער געהערט די געוואלדיגע גריסן פונעם מעמד קודש בבית כ"ק האדמו"ר שליט"א, ווי אויכט די קינדער פון די 'ביחד' ו'בשבילך' ארגעניזאציעס, האט זיי באנומען אן אומגעהויערע פרייד און קורת רוח, אין א בחי' פון כרחם אב על בנים – זיי האבן געשפירט נאך אביסל געטריישאפט, אהבה און חיזוק, וואס זיי לעכצן אזוי צו שעפן אבער האבן נעבעך נישט געהעריג פון וואו.
דער מצב פון די קינדערלעך אין די מוסדות איז דאך א טעם גן עדן, א נייע ליכט פון האפענונג, א רעטונג, אן אינזל פון רואיגקייט און הרחבת הדעת נאך קאפיטלעך פון שטורעם און אנגסט, ווייטאג און פארלוירנקייט.
ווי געשמועסט, לא יאומן כי יסופר די געשיכטעס וואס די מיידלעך פרובירן צו לאזן הונטער זיך ביים אריינקומען אין די לעכטיגע טויערן פון "בית לפליטות." ווערטער זענען נישט גענוג, און טרערן גיסן איבער, ביים מיטהאלטן אפילו מינימאלע איינצלהייטן וואס דא טוט זיך.
*
דעם הייליגן יום טוב ראש השנה, וועלן די מיידלעך פון בית לפליטות האבן פרעכטיגע "מחזורים" און קענען גיין אין ביהמ"ד מיטהאלטן די תפילות און תקיעות, אין באגלייטונג פון די מדריכות. דעם ראש השנה, וועלן די מיידלעך שתחי' קענען שפירן דעם טעם פון "עפל אין האניג" ביי א לעכטיגע שיינענדיגע פרעכטיגע יום טוב'דיגע טיש, אלעס ציכטיג און ניי און פריש און הייליג.
דעם הייליגן יו"ט ראש השנה וועלן די טייערע קינדערלעך שתחיו פון "בית לפליטות" עפענען די שערי שמים און שפאלטן הימלען ביז'ן כסא הכבוד און פועל'ן פאר זיך און פאר גאנץ כלל ישראל א כתיבה וחתימה טובה, א גוט געבענטשט יאר מיט אלעם גוטן.
