די גרעסטע משפחה אינערהאלב כלל ישראל, וואס נעמט אריין אלע אידישע קינדערלעך וואס זענען געבוירן געווארן בס״ד מיטן זכות און השתדלות פון די וועלט בארימטע "בוני עולם" ארגענעזאציע, איז די וואך אנגעקומען צו א דראסטישע ציפער פון גאנצע דרייצן טויזענט אידישע נשמות בליעה"ר.
דורכאויס די לעצטע צוויי צענדליג יארן וואס בוני עולם איז אקטיוו ארויסצוהעלפן אידישע קינדער וואס לעכצן און ווארטן געהאלפן צו ווערן מיט זרע של קיימא, האבן זיי שוין זוכה געווען ארויסצוהעלפן טויזענטער אידישע פאמיליעס, וואס ביי זיי איז לעכטיג געווארן און האבן זוכה געווען צו האלזן א אייגן קינד, די שמחה פון בוני עולם איז א שמחה פאר גאנץ כלל ישראל, כלל ישראל האט שוין אריינגעלייגט אין דעם הייליגן מוסד הונדערטער מיליאנען דאללער, און קוקן כסדר ארויס אויף נאך שמחות בשלימות ביי די וואס ווארטן נאך צו געהאלפן ווערן.
