אין די צייט וואס ביי פילע אדמורי"ם ורבנים נעמט מען אן די הלכה אז פרסומי ניסא איז פיל חשובער, און דעריבער צינדט מען די נרות אין בית המדרש ברוב עם הדרת מלך, טראץ וואס מען וואוינט נישט אין בית המדרש, איז כ"ק אדמו"ר מאמשינאוו שליט"א יא מקפיד דערויף גאר שטארק, און דער רבי האט קיינמאל נישט געוואלט צינדן די נרות אין בית המדרש וועלנדיג צינדן אין זיין געהעריגע דירת קבע.
דאס האט צוגעברענגט אז די חסידים האבן נישט געקענט געהעריג מיטהאלטן דעם רבינ'ס ליכט צינדן, וואס איז ווי באקאנט א גאר געהויבענע עבודה, און דאס יאר האט מען אויסגעפועל'ט ביים רבי'ן אז כאטש איין נאכט זאל ער צינדן די מנורה אין בית המדרש כדי צו געבן פלאץ פאר די חסידים מיטצוהאלטן.
וועלנדיג מאכן די בית המדרש אלס א דירת קבע, האט דער רבי שליט"א זיך אריינגעצויגן אויף שבת חנוכה בביתו נאוה קודש פונעם זיידן הרה"ק רבי מאיר'ל מאמשינאוו זי"ע, וואס געפונט זיך אינעם זעלבן בנין פון די אמשינאווער בית המדרש אין בית וגן, דער רבי האט זיך אויפגעהאלטן דארט גאנץ שבת נאכמיטאג און מוצאי שבת, און דערביי אפגעראכטן די עבודה וסדר השבת כדרכו בקודש. מוצאי שבת פינף אזייגער פארטאגס איז דער רבי אריינגעקומען צום מעמד הדלקת נר חנוכה אין ביהמ"ד, וואס איז געווען איבערגעפולט מיט חסידים טראץ די שפעטע שעה.
