מיט גרויס צער ווערט אויפגענומען די שווערע בשורה איבער די פטירה בשיבה טובה פון הרבנית דבורה בערגמאן ע"ה, אשת חבר מרן הגאון הגדול רבי מאיר צבי בערגמאן שליט"א, און טאכטער פונעם גאון הדור ושר התורה, הגאון הגדול הרב שך זצ"ל בעל אבי עזרי.
די רעבעצין איז געווען יארן לאנג די עזר בקודש ביים גאון דער ראש ישיבה שליט"א, צוגעשטאנען לימין קדשו צו קענען מרביץ תורה זיין מיט הרחבת הדעת, מיט אנדערטהאלבן יאר צוריק האט זי ליידער פארלוירן איר זון הרה"ג ר' עזריאל בערגמאן זצ"ל, און אצינד איז זי נתבקש געווארן לישיבה של מעלה בשיבה טובה, אין הויכן עלטער פון זיבן און ניינציג יאר, איבערלאזנדיג איר גרויסער מאן דער ראש ישיבה שליט"א און א הערליכע דור פון חשובע קינדער און אייניקלעך.
די מסע הלוויה וועט פארקומען היינט נאכט ליל זאת חנוכה, פארנט פון איר שטוב אויף רחוב האדמו"ר מגור אין בני ברק, און זי וועט קומען לקבורה אויפן פאנאוויטשע בית החיים אין בני ברק, נעבן איר גרויסן פאטער דער גאון זצ"ל.
