אינערהאלב קהל יטב לב ד'סאטמאר אין וויליאמסבורג, וועט זיך דעם שבת עפענען א נייע בית המדרש מיטן נאמען "נחלת יעקב", דאסמאל אין די ניי וויליאמסבורג געגנט אויף וואלווארט סטריט, געאייגענט ספעציעל פאר די צעירי האברכים פון די קהילה וואס האבן לעצטנס חתונה געהאט.
אלס דיין ומורה צדק אין די נייע בית המדרש, איז אויפגענומען געווארן הרה"ג ר' צבי הירש לייטנער שליט"א מו"ץ בק"ק סאטמאר, א זון פון הגה"צ ר' נפתלי דוד לייטנער שליט"א, און איידעם ביי הגה"צ ר' יואל צבי שטיינמעטץ שליט"א אב"ד באגאד, אייניקל פון די צוויי שרי התורה ומגדולי הרבנים אין סאטמאר, הגה"צ גאב"ד מאנטיוואדעא זצ"ל, און הגה"צ גאב"ד פאיע זצ"ל.
דעם זונטאג נאכמיטאג איז פארגעקומען א באשיידענע מעמד הכתרה בביתו נאוה קודש פון כ"ק אדמו"ר מסאטמאר שליט"א, וואו דער רבי האט ממנה געווען דעם נייעם דיין שליט"א לשרת בקודש, ולהורות את דבר השם זו הלכה. אצינד גרייט מען זיך צום מעמד קביעת מזוזה און מסיבת לחיים פאר די נייע בית המדרש, וואס וועט פארקומען מארגן דאנערשטאג אינעם היכל בית המדרש, אין שפיץ פון כ"ק אדמו"ר מסאטמאר שליט"א וועלכער וועט משמיע זיין דברי ברכה לרגל המאורע, און א ספעציעלע איינצוגס דרשה וועט מען הערן פונעם דיין הקהילה הרה"ג ר' צבי הירש לייטנער שליט"א.
די נייע בית המדרש איז סטאנציאנירט אין א פראכטפולע לאקאל אויף 94 וואלווארט סטריט, און וועט זיך עפענען דעם שבת קודש פארן ברייטן ציבור דורכאויס אלע תפילות בליל וביום השבת. שבת אינדערפרי נאכן דאווענען וועט געפראוועט ווערן א גרויסע קידוש לרגל די הרחבת גבולי הקדושה.
