א געהויבענע נסיעה איז אריבער אויף פילצאליגע נגידי ותומכי חצר הקודש מאקאווא, ווען מען איז ארויסגעפארן אינאיינעם מיט כ"ק הגה"צ גאב"ד מאקאווא שליט"א צו פוקד זיין די מקומות הקדושים אין פוילין, מיט די ספעציעלע זכיה ארויסצוהעלפן די ווייטערדיגע פעולות נשגבות פונעם רב שליט"א, צו פארשפרייטן אידישקייט און מחזק זיין תורה צדקה וחסד בארץ הקודש.
אנקומענדיג קיין פוילין דאנערשטאג פרשת וארא, איז דער רב שליט"א געפארן צום שטאט גור, און געדאווענט מעריב בבית מדרשם פון די הייליגע צדיקים לבית גור, דאן האט מען פוקד געווען די קברי צדיקים, די ציונים הק' פונעם הייליגן חידושי הרי"ם זי"ע און זיין אייניקל דער הייליגער שפת אמת זי"ע.
פון דארט איז מען געפארן קיין קאזשניץ, אויף א תפילה ביים ציון הק' פונעם הייליגן קאזשניצער מגיד זי"ע בעל עבודת ישראל. דערנאך האט מען פארגעזעצט די נסיעה צום שטאט לובלין, און פוקד געווען דעם ציון הק' פונעם הייליגן חוזה זי"ע, און דער הייליגער רבי'ן ר' צדוק פון לובלין זי"ע. דארט אין לובלין איז געפראוועט געווארן א הערליכע שבת אין די נאסטאלגישע בנין פון ישיבת חכמי לובלין.
מוצאי שבת האט מען פארגעזעצט די נסיעה צום שטאט ליזענסק, אויף א תפילת רבים ביים ציון הק' פונעם הייליגן רבי'ן ר' אלימלך זי"ע, דארט איז אויך פארגעקומען א פראכטפולע מלוה מלכה, וואו עס האט אויפגעטרעטן אלס נואם הכבוד הגה"צ ר' פנחס חיים גרינוואלד שליט"א אבד"ק פאפא מאנסי.
