מיט זעכצן חדשים צוריק האבן די תלמידים פון די גערער ישיבה "שפתי צדיק" אין שטאט חצור, זיך צוזאמגעפאקט די פעק און איבערגעלאזט די בנין הישיבה, נאך וואס כ"ק אדמו"ר מגור שליט"א האט איבערגעגעבן די הוראת הקודש אז די חסידים זאלן נישט פארבלייבן אין די צפון געגנטער אין ארץ ישראל, צוליב די אנגעצויגענע מלחמה צושטאנד וואס האט צושטערט די טאג טעגליכע לעבן.
אויף דערווייל האט די הנהלה פון איחוד מוסדות גור, איינקוואטירט די תלמידי הישיבה אין אנדערע בנינים פון מוסדות התורה אין שטאט בית שמש, וואו די בחורים האבן געהארעוועט בתורה ועבודה טראץ די אומבאקוועמע אומשטענדן. אין די לעצטע צוויי חדשים זינט די פייער אפשטעל איז אריין אין קראפט צווישן די מדינת ישראל מיליטער און די כיזבאלא טעראר גרופע, האט די הנהלת הישיבה ערהאלטן די הוראת הקודש פונעם רבי'ן שליט"א אז מען קען שוין אנהייבן קלערן פון צוריקגיין צום בנין הישיבה אין חצור.
זעענדיג אז די פייער אפשטעל האלט אן, און אחינו בני ישראל אין צפון ארץ ישראל קערן זיך צוריק צום טאג טעגליכן לעבנסשטייגער, האבן זיך די תלמידי הישיבה ארויסגעלאזט נעכטן אויפן וועג צוריק קיין חצור, מיטשלעפנדיג די גאנצע האב און גוטס צוריק צום אייגענעם אכסניא אין צפון ארץ ישראל.
