יעצט נאכמיטאג איז באשטעטיגט געווארן אז כ"ק אדמו"ר מבאבוב שליט"א וועט אונטערנעמען א מסע הקודש קיין אנטווערפן, צום ערשטן מאל נאכן איבערנעמען די כתר האדמורו"ת מיט צוואנציג יאר צוריק.
די מסע הקודש וועט פארקומען ענדע ווינטער, קומענדיגן חודש אדר אין די וואך פון פרשת פקודי, ווען דער רבי וועט מופיע זיין בשערי העיר פאר א באזוך פון עטליכע טעג, און באשיינען א רייע מעמדים נשגבים בתוככי הקהילה, איבערהויפט די מעמד הכנסת ספר תורה לזכרו הטהור פון הגה"צ ר' משה האלבערשטאם זצ"ל לאנגיעריגער רב ודומ"ץ אין די באבובער קהילה אין אנטווערפן.
מטעם ביתו נאוה קודש פון כ"ק אדמו"ר מבאבוב שליט"א זענען א גרופע עסקנים ארויסגעפארן קיין אנטווערפן צו מסדר זיין אלע דעטאלן פון די געהויבענע מסע הקודש מעבר לים, און מיט די ארטיגע עסקנים באשטימען אלע מעמדי קודש צו וואו עס וועלן קומען צו פארן פילע חסידים פון איבער די וועלט.
אויך ווערט געפלאנט א גרויסע מעמד קודש לצדקת רבי מאיר בעל הנס כולל חבת ירושלים, ווען די יערליכע דינער אין אנטווערפן קומט פאר יאר יערליך אין דעם תקופת השנה. די מעמד וועט באשיינט ווערן דורך די חשובע נשיאי הכולל, כ"ק אדמו"ר מפשעווארסק שליט"א נשיא הכולל באייראפע, און כ"ק אדמו"ר מבאבוב שליט"א נשיא הכולל בארה"ב.
