אין די יעצטיגע טעג איז אריין אין קראפט א מאסיווע בוי פראיעקט צו גענצליך איבערבויען און רענאווירן די גרויסע טשערנאבילער בית המדרש אין בני ברק, בית מדרשו פון כ"ק אדמו"ר מטשערנאביל שליט"א וועלכער רעכט אפ די כסדר'דיגע עבודת הקודש אין דעם בית המדרש שוין לאנגע יארן.
אין לויף פון די לעצטע פאר יאר האבן די עסקני הקהילה שוין דורכגעטון מערערע אפציעס, אין ליכט פון די שרעקליכע געדרענג און אומבאשרייבליכע וויכטיגקייט פון אויפבויען א נייע בית מקדש מעט. צווישן די פלענער האט מען שוין געטון פאקטישע שריט אויפצובויען א שפאגל נייע בנין בית המדרש, אבער צוליב פילע שוועריגקייטן האט מען דאס נישט געקענט אויספירן אין פאקט.
אצינד האט די הנהלת בית המדרש פראקלאמירט די פרישע פלענער, אין וואס די יעצטיגע היכל ביהמ"ד וועט ווערן פראכטפול רענאווירט און איבערגעבויעט, אין א פראיעקט צוצוברענגען די מאקסימום צאל זיץ פלעצער אין ביהמ"ד צו איבער זעכצן הונדערט.
פארלאפענעם דאנערשטאג איז פארגעקומען א גרויסע כינוס פאר כלל חסידי טשערנאביל, מיטן נאמען "התנערי", דארט איז געמאלדן געווארן די גענויע פלענער פון די בוי פראיעקט, ווען די ציבור החסידים האלט קלאר מיט די פארשריט און די נויט דאס אונטערצונעמען, אונטער די פערזענליכע ווענדונג פונעם מנהיג העדה כ"ק אדמו"ר מטשערנאביל שליט"א וועלכער האט אליינס געבעטן פון די חסידים צו זיין א טייל ביי דעם אסיפה און צולייגן א פלייצע.
די היכל ביהמ"ד אויפן העכערן שטאק, וואו עס פלעגט ביז נישט לאנג צוריק זיין די היכל הישיבה, וועט אצינד ווערן פארברייטערט אויפן שטח פון די גאנצע שטאק, מען וועט אויפמאכן די צוויי שטאק ארויפציר וואו עס פלעגט זיין די ישיבה דארמיטארי, אזוי אז די היכל ביהמ"ד זאל זיין הויעך און לופטיג, און ארום און ארום וועט מען לאזן די שטאקן פאר צוויי שטאק גאלעריעס.
די פילע זוילן לענגאויס די היכל ביהמ"ד וועט מען אוועקנעמען, און אנשטאט דעם אונטערלייגן פיר שטארקע זוילן אונטער די גאלעריעס. און אויסער דעם וועט מען צובויען נאך א רייע וויכטיגע פונקטן, א דירה פארן רבי'ן אויף מזרח זייט, און אויף די שטאקן ארויף צוויי שמחה זאלן, די אונטערשטע שטאק וועט מען איבערבויען צו צוויי גרויסע שטיבלעך, א היכל התורה וואו עס פלעגט זיין די אלטע שוהל, און נאך פארשידענע איינריכטונגען וואס מען האפט צו קענען אויספירן.
לויט די פלענער הייבט מען אן די בוי ארבעט שוין יעצט ראש חודש אייר, און אויף ראש השנה בעז"ה וועט מען שוין באנייען דעם איבערגעבויעטן היכל ביהמ"ד. ביזדערווייל וועט מען דאווענען אינעם אלטן שוהל אויף די אונטערשטע שטאק, וואו די בוי ארבעט וועט בעז"ה פארקומען אין די ווינטער חדשים.
