א שיינע שמחה איז פארגעקומען נעכטן זונטאג אויפדערנאכט אין קרית קרעטשניף רחובות, ווען כ"ק אדמו"ר מקרעטשניף שליט"א האט אין א זעלטענע מאמענט אונטערגעפירט א כלה א יתומה אונטער די חופה, נאך וואס דער רבי שליט"א האט מיט יארן צוריק פארשפראכן זיך צו זארגן פערזענליך פאר די קינדערלעך נאך די פריצייטיגע פטירה פון זייער פאטער, הרב החסיד ר' מרדכי שאמועל ע"ה.
ר' מרדכי איז געווען פון די חשובע מחנכים אין תלמוד תורה קרעטשניף, און איז ליידער נפטר געווארן מיט פופצן יאר צוריק אין בליענדן עלטער פון דרייסיג יאר, איבערלאזנדיג א שטוב מיט קליינע יתומים'לעך אינדערהיים. דער קרעטשניפער רבי האט זיך דאן אונטערגענומען צו מגדל זיין די יתומים און זיי פערזענליך באזארגן מיט אלעס וואס זיי דארפן, און אצינד ווען עס איז געפראוועט געווארן די שמחת החתונה פון די כלה די יתומה, האט דער רבי שליט"א געדינט פערזענליך אלס עומד מצד הכלה.
דער רבי האט באשיינט די שמחת החתונה אנגעהויבן פונעם מעמד קבלת פנים, דערנאך ביים מעמד החופה ווען דער רבי מיט די רעבעצין האבן אונטערגעפירט ווי ביי אן אייגן קינד, דער רבי האט מסדר קידושין געווען, און איז צוריקגעקומען שפעטער ביינאכט צום סעודת החתונה און געפראוועט א לחיים טיש, און דערנאך געטאנצן מצוה טאנץ לפני הכלה, און א באזונדערע טאנץ מיט די חתן און מחותנים.
