היינט דאנערשטאג מיטאג איז כ"ק אדמו"ר מבעלזא שליט"א בחסדי ה' באפרייט געווארן פון שפיטאל, נאכן זיין אין שפיטאל פאר א וואך צייט, וואו דער רבי איז אריבער א אפעראציע דעם זונטאג, וואס איז ב"ה געקרוינט געווארן מיט הצלחה.
דער רבי שליט"א איז אריינגעפארן אין שפיטאל פארגאנגענע סוף וואך, נאך שווערע יסורים וואס האט געפלאגט דעם רבי'ן א שטיק צייט. נאכן דורכפירן די נויטיגע אונטערזוכונגען איז באשלאסן געווארן דורכצופירן אן אפעראציע, מיטן ציהל צו פארגרינגערן דעם רבי'ן פון די שווערע יסורים, מיטן אויבערשטנס הילף האט עס עושה רושם געווען, און דער רבי ערהוילט זיך דורכאויס די וואך מיט א שטארקע פארבעסערונג אינעם מצב.
היינט מיטאג האבן די דאקטוירים אין די הדסה שפיטאל געמאלדן אז דער רבי קען שוין פארלאזן די שפיטאל ווענט, און זיך אהיימקערן לביתו נאוה קודש אין קרית בעלזא ירושלים. די עסקנים האבן צוגערישט דעם רבינ'ס שטוב אז דער רבי זאל ווייטער קענען באהאנדלט ווערן מיט גרויס געטריישאפט, מיטן האפענונג אז דער רבי זאל ווי שנעלער צוריקקומען צו די כוחות בבריות גופא ונהורא מעליא.
הונדערטער חסידי בעלזא זקנים עם נערים האבן אפגעווארט דעם רבי'ן ברחובות העיר אין קרית בעלזא ירושלים, וואו מען האט מקבל פנים געווען דעם רבי'ן בשירה וזמרה, מיט א תפילה אויף ווייטער שיתחדש כנשר נעוריו, עוד ינוב בשיבה דשנים ורעננים.
