ווי באריכטעט פארלאפענעם מיטוואך, איז איבערגעגעבן געווארן די קלארע דעת תורה פון די גדולי הדור די זקני ראשי הישיבות בארץ הקודש, אפצוהאלטן א גרויסארטיגע עצרת תפילה וזעקה ברחובה של עיר, אין ליכט פון די שרעקליכע רדיפת הדת אין ארץ ישראל, ווען די רשעי הציונים טוען אינפארסירן דעם גזירת הגיוס קעגן לומדי תורה היל"ת.
טראץ וואס די ארגינעלע פלאן איז געווען אפצוהאלטן דעם גרויסן עצרת היינטיגן זונטאג, האבן זיך די פלענער געטוישט ווען די עסקנים האבן זיך אריינגעווארפן אין די ארבעט אויסצוארבעטן די טעכנישע דעטאלן, און נאכן דורכגיין אלע אפציעס צו ערהאלטן באשטעטיגונג פון די שטאטישע באאמטע, און נאך א רייע ענינים אויסצוארבעטן, האט מען געלאזט אין גאנג א רייע העפטיגע אסיפות צווישן מערערע פראקציעס פון דאס יהדות החרדית בארץ הקודש, און אצינד איז געפאלן די גענויע פלענער אז א גרויסארטיגע "עצרת המיליאן" וועט ווערן אפגעהאלטן דעם קומענדיגן דאנערשטאג פרשת לך לך ח' חשון.
היינט זונטאג דורכאויס די טאג איז פארגעקומען א זיצונג צווישן די הויפט עסקנים, פארשטייער פון מערערע חרדישע קרייזן, און די פאליציי הויפטן אין פארשידענע שטעט, וואו עס איז באשטעטיגט געווארן אז די עצרת וועט פארקומען ברחובה של עיר ביים אריינגאנג צו ירושלים עיר הקודש, פון די הויפט שאסייען ביז די גאסן פון שרי ישראל און מלכי ישראל בפלטרין של מלך, ווען לענגאויס די אלע גאסן וועלן זיך פארזאמלען הונדערטער טויזענטער אידן פון אלע שיכטן און קרייזן, און צוזאמען מיט א כח הרבים איינרייסן ביים בורא כל עולמים לביטול רוע הגזירה, ווען צו די זעלבע צייט וועט מען ארויסברענגען דעם קול מחאה אדירה קעגן די רדיפת הדת בארצינו הקדושה.
א באזונדערע זיצונג איז פארגעקומען היינט אינעם לשכת העדה החרדית, אין שפיץ פונעם פוסק הדור מרא דארעא קדישא, ואתו עמו די שרי התורה חברי ביד"ץ העדה החרדית, אינאיינעם מיט חשובע ראשי ישיבות פון די ליטווישע קרייזן, און הגאון רבי שלום בער סורוצקין שליט"א ראש רשת הישיבות עטרת שלמה, וואו מען האט דורכגעשמועסט די אפציעס צוזאמצוברענגען אלע שיכטן און קרייזן אויסצושרייען א פאראייניגטע קול מחאה אדירה, אין שפיץ פון אלע גדולי הדור, די חסידישע רביים, די ליטווישע ראשי הישיבות, די ספרדישע גדולי החכמים, און די מנהיגי ישוב הישן תחת דגל העדה החרדית.
לויטן יעצטיגן פלאן וועט די גרויסארטיגע עצרת פארקומען דעם דאנערשטאג לך לך האלב נאך צוויי נאכמיטאג, און וועט ארייננעמען אמירת תהלים און סליחות בהתעוררות רב, און קבלת עול מלכות שמים פון אזא ריזן ציבור וואס וועט אפהילכן מסוף העולם ועד סופו. עס וועט נישט זיין קיין צענטראלע פלאטפארמע פאר א אויבן אן, נאר די גדולי ישראל אדמורי"ם רבנים וראשי ישיבות וועלן זיך געפונען אין באשטימטע ערטער איינגעטיילט לויט די גאסן. אצינד ווערט געמאכט די ווייטערדיגע צוגרייטונגען דורך א מאסיווע מיליטער פון עסקנים פון אלע שיכטן און קרייזן, ווען אלעס קוקט ארויס אויף איין ציהל:
לקדש שם שמים!
