תלמידי וחסידי טאהש אין ניו יארק וואס זענען די לעצטע פאר יאר עטליכע מאל איבערראשט געווארן מיט די געוואלדיגע הרחבת גבולי הקדושה, ווען עס איז געעפנט געווארן א צאל סניפי המוסדות אין ניו יארק, ישיבה קטנה און ישיבה גדולה, א חדר אין מאנסי און א מיידל שולע אין וויליאמסבורג, זענען אצינד ווידער איבערראשט געווארן מיט די מעלדונג אז צום קומענדיגן לערן יאר וועט געעפנט ווערן א נייע טאהשער מיידל שולע אין שטאט מאנסי.
די נייע מיידל שולע "בנות חוה" ווערט געעפנט צום קומענדיגן שנת הלימודים, חודש אלול תשפ"ו, בברכתו ובעידודו פון כ"ק אדמו"ר מטאהש שליט"א, וועלכער האט א נאמען געגעבן פאר די מיידל שולע בנות חוה, לשמה ולזכרה פון אמה של מלכות הרבנית הצדיקת מטאהש ע"ה, מחברתו הטהורה פון כ"ק אדמו"ר הרה"ק מטאהש זצ"ל.
אין שפיץ פון די רוחניות'דיגע אקטיוויטעטן וועט שטיין בנו חביבו פון כ"ק אדמו"ר מטאהש שליט"א, הגה"צ ר' חיים יחיאל אלטר סג"ל לאווי שליט"א רב חסידי טאהש אין מאנסי, וועלכער שטייט אויך אין שפיץ פון די תלמוד תורה און די ישיבה אין ניו יארק.
