טויזענטער סקווירא חסידים פון נאנט און ווייט האבן זיך מיטגעפריידט ביי די געהויבענע שמחת החתונה בחצר הקודש סקווירא, ווען עס איז געגאנגען אונטער די חופה די כלה א אור אייניקל ביים רבי'ן, מיט די חתן א אייניקל פון כ"ק האדמורי"ם מקאלוב און דעעש שליט"א, אבער אנדערש ווי א געווענליכע חתונה אין סקווירא הויף, איז די דאזיגע שמחה פארגעקומען אין די שבעת ימי האבל, ווען דער רבי שליט"א איז געזעסן שבעה נאך זיין שוועסטער הרבנית הצדיקת מראחמיסטריווקא ע"ה.
לויט די הוראה און פסק פון הגה"צ רבי יוסף ישראל אייזענבערגער שליט"א דומ"ץ שיכון סקווירא, האט דער רבי שליט"א מיטגעהאלטן א גרויס טייל פון די שמחת החתונה, סיי די מעמד קבלת פנים און חופה, און סיי די טאנצן ביים סעודת החתונה אין די מצוה טאנץ. פארט איז אבער געווען קענטיג פארשידענע טוישונגען צוליב די אבילות.
די חתן מאהל א נאכט פאר די חתונה איז געפראוועט געווארן מיטן אפוועזנהייט פונעם רבי'ן, ביים חתונה איז דער רבי געגאנגען אנגעטון מיטן שטריימל און קאפטן, אבער אונטער די געהעריגע בעקיטשע איז דער רבי געגאנגען מיט א דינעם כאלאטל וואס דער רבי האט אויך געריסן קריעה דערויף ביים לוויה. אזוי אויך איז דער רבי נישט געגאנגען קיין שטיוול ווי געווענליך, נאר קאלאטשן וואס מען האט באקוועם געמאכט פארן רבי'ן פאר די חתונה.
נאכן חופה האט דער רבי אויסגעטון די שטריימל און מקבל געווען תנחומין, די סעודת החתונה האט דער רבי געגעסן אליינס אין צימער, זייענדיג אליינס ביי א טיש, וויבאלד דער רבי האט נישט געמעגט מיטעסן מיט די סעודת החתונה ווי יעדן איינעם. אזוי אויך האט דער רבי נישט געטאנצן קיין געווענליכע טענץ, נאר ביים מצוה טאנץ מיט די כלה, און דערנאך מיטן חתן און די מחותנים.
