א וואלקן פון טרויער האט זיך אראפגעלאזט היינט צופרי מיט די ביטערע בשורה פון ארץ ישראל, איבער די פלוצלינגדיגע הסתלקות פונעם גדול המקובלים בארה"ק, הגאון המפורסם רבי דוד שלום בצרי זצ"ל ראש ישיבת המקובלים "השלום" אין ירושלים עיה"ק, אין עלטער פון פינף און אכציג יאר.
דער גאון ומקובל מפורסם ר' דוד איז געווען שטארק באקאנט איבער די גאנצע וועלט מיט זיין גדלות בתורה און געוואלדיגע השפעה אויף אחינו בני ישראל הספרדים, טויזענטער אידן האבן משכים געווען לפתחו און נהנה געווען פון אים עצה ותושיה, צענדליגע יארן האט ער מרביץ תורה געווען און אריינגעשיינט א לעכטיגע אור בעולם הקבלה, סיי אין די ספרדישע קרייזן און סיי ביי חסידים צוגלייך.
הגאון רבי דוד שלום בצרי זצ"ל איז געבוירן געווארן י"ד אב תש"א צו זיין פאטער הרב יוסף בצרי זצ"ל, ער האט געצויגן א הערליכע יחוס צום הייליגן בן איש חי זי"ע און נאך גדולי המקובלים חכמי ספרד. אלס בחור האט ער געלערנט אין די באקאנטע ישיבה פורת יוסף אין אלטשטאט ירושלים, וואו ער איז געווען א תלמיד פונעם ראש ישיבה הגאון רבי עזרא עטיה זצ"ל, ובהגיעו לפירקו איז ער געווארן אן איידעם ביי הגאון המקובל רבי סלמן מוצפי זצ"ל ראש ישיבת בני ציון.
אלס אינגערמאן האט ער מייסד געווען דעם ישיבת המקובלים "השלום" אין די מקור ברוך געגנט אין ירושלים, לשמו ולזכרו פונעם הייליגן רש"ש זי"ע. דארט האט ער פארגעלערנט שיעורים בתורת הקבלה, און געלערנט מיט זיינע תלמידים די כוונות התפילה לויטן סידור הרש"ש. ער איז געווען גאר שטארק באקאנט מיט זיין כח התיקונים, ער פלעגט אפרעכטן תיקונים פאר נויטבאדערפטיגע אידן, פארשידענע תיקונים ווי עס ווערט געברענגט אין ספרי קבלה, אזוי אויך איז ער שטארק באקאנט געווארן איבער די וועלט מיט זיין כח התיקונים צו פארטרייבן דיבוקים.
דער מקובל איז געווען א פלאם פייערדיגער בעל דרשן וועלכער האט זוכה געווען צו מעורר זיין טויזענטער אידן לשמירת התורה והמצוות, זיין נאמען איז געווען מפורסם גאר ווייט און ער האט זוכה געווען צו מחזיר בתשובה זיין פילצאליגע פארבלאנדזשעטע נשמות.
היינט צופרי ערב יו"ט איז דער מקובל פלוצלינג צוזאמגעפאלן רח"ל, אין זיין שטוב אויף רחוב הרב לאנדא אין בני ברק, וואו ער האט געוואוינט די לעצטערע יארן. טראץ די נאכאנאנדע פרואוון פון די הצלה לייט און שטורמישע תפילות פון פילע אידן, איז אבער באשטעטיגט געווארן די ביטערע בשורה ויצאה נשמתו בטהרה.
די לוויה האט זיך אנגעהויבן היינט ערב יו"ט נאכמיטאג צוויי אזייגער בהיכל ישיבת המקובלים השלום אויף רחוב תחכמוני אין ירושלים עיה"ק, און די מיטה ווערט געפירט צום בית החיים סנהדריה למנוחת עולמים, מיט די באטייליגונג פון טויזענטער אידן.
וכל בית ישראל יבכו את השריפה אשר שרף ה'.
