אן אויסטערלישע און היסטארישע שמחה איז פארגעקומען פארגאנגענעם דינסטאג, ט"ז חשון, אין אסלא, די הויפטשטאט פון נארוועגיע, וואו עס איז אפגעראכטן געווארן א פראכטפולע אידישע חתונה, צום ערשטן מאל זינט דעם צווייטן וועלט קריג.
די שמחה איז פארגעקומען לרגל די חתונה פון א טאכטער ביי הרב שאול ווילהעלם שליט"א, דער ליובאוויטשער שליח אין נארוועגיע, וועלכער איז שוין איבער 20 יאר עוסק אין פארשפרייטן אידישקייט צווישן די ארטיגע אידן.
הונדערטער געסט האבן זיך באטייליגט ביי דער שמחה, צווישן זיי עלטערע אידן פון דער ארטיגער קהילה, פאר וועמען דאס איז געווען דאס ערשטע מאל אין לעבן מיטצוהאלטן אן אמת'ע אידישע חתונה כדת משה וישראל.
א באזונדערע אונטערנעמונג איז געווען דאס צושטעלן די סעודת החתונה, וואס איז דורכגעפירט געווארן דורך די זקופנה קעטערינג , פון דעם באקאנטן זקופנה האטעל אין פוילן, וועלכע האבן אהערגעשטעלט א פולשטענדיגע קיך אויפן ארט און צוגעגרייט הונדערטער פארציעס פאר די משתתפים.
דאס האט פארלאנגט א געוואלדיגע צוגרייטונג, סיי אויפן געביט פון כשרות און סיי מיטן אהערשטעלן אלע געברויכן אין א לאנד וואו שחיטה כשרה איז שוין פארבאטן זינט יאר 1929.
די סעודה איז צוגעגרייט געווארן אונטער דער מהודר'דיגער השגחה פון התאחדות הרבנים, און איז נאך איינע פון די גרויסע אינטערנאציאנאלע שמחות וואס זקופנה שטעלט צו אין פארשידענע לענדער איבער דער וועלט.
