דעם קומענדיגן מוצאי שבת פרשת בהר ליל ל"ג בעומר, וועט הגה"צ גאב"ד סאטמאר מאנסי שליט"א אפרעכטן א גרויסארטיגע מעמד הדלקה ברחבת ביהמ"ד הגדול אין מאנסי, מיט די באטייליגונג פון טויזענטער איד חסידים ואנשי מעשה, די ערשטע מאל וואס דער רב וועט פראווענען א גרויסע הדלקה ברוב עם הדרת מלך.
אין די פארגאנגענע יארן פלעגט דער רב פארברענגען דעם גרויסן טאג בין כותלי הישיבה צוזאמען מיט די בחורים, און געפראוועט א באשיידענע הדלקה מיט די באטייליגונג פון די תלמידי הישיבה, אצינד איז געמאלדן געווארן אז דאס יאר וועט די הדלקה פארקומען אויף א גרויסע פארנעם, צוגעשטעלט דורך מפעל מבחר החיים פון די קהילה.
די גרויסע הדלקה וועט פארקומען אויפן נייעם ריזן פארקינג לאט ברחבת ביהמ"ד הגדול סאטמאר ביים ווינקל פון מעיפל עוועניו און מאנסי באלערוואד, באגלייט מיט ניגוני התעוררות און פרייליכע ריקודים לכבוד התנא הרשב"י. עס וועט פארקומען תיכף נאך מעריב און הבדלה אין ביהמ"ד הגדול, און די עסקנים ארבעטן נאך אויס די טעכנישע דעטאלן על צד היותר טוב.
נאך די מעמד ההדלקה וועט פארקומען א גרויסע מסיבת לחיים אין ביהמ"ד הגדול, וואו דער רב שליט"א וועט משמיע זיין דברות קודש לכבוד האי יומא רבא.
