די נאנט צו צוויי הונדערט איינוואוינער אין די באקאנטע בארא פארק צענטער, האבן ווי יאר יערליך מיטגעהאלטן א געהויבענע און פרייליכע יו"ט ל"ג בעומר, ווען אלע האבן זיך געפרייט אינאיינעם מיט לעבעדיגע טענץ, פרייליכע מוזיק, ווארעמע אינספירירנדע דרשות און דברי חיזוק, און ספעציעלע פראגראמען אין לויף פון די טאג.
די פרייליכע מעמד איז פארגעקומען אין גארטן פון די בארא פארק צענטער, וואו די הערליכע געשמאקע וועטער האט פיל צוגעגעבן צום אטמאספער, די באקאנטע ברידער ר' אברהמי בערקא און ר' יהושע בערקא הי"ו, האבן מהנה געווען מיט כלי זמר און געזאנג לכבוד התנא האלקי רבי שמעון בר יוחאי, באגלייט מיט פרייליכע טענץ דורך פילע אידן וואס זענען געקומען זיך מיטפרייען אין דעם גרויסן טאג.
צענדליגע וואלאונטירן פון די וואוילטעטיגע "טאנצערס" ארגענעזאציע האבן פרייליך געמאכט די אנוועזנדע, קונצן מאכער האבן פארגעשטעלט אינטערסאנטע איבערלעבענישן, און ווארעמע ווערטער איז געהערט געווארן דורך הרה"ג ר' אהרן ווייספעלד שליט"א, וועלכער האט ארומגערעדט איבער די גרויסע זכות פונעם בעל ההילולא רבי שמעון בר יוחאי, וואס וועט זיכער משפיע זיין פאר אלע אנוועזנדע א רפואה שלימה און אלעס גוטס.
