ווי באריכטעט מיט עטליכע וואכן צוריק, ווערן געמאכט פיבערהאפטיגע הכנות צו אן ערשטמאליגע כינוס אדיר פאר כלל תלמידי וחסידי קאשוי, כינוס "אהבת תלמידים", וואו עס וועלן זיך צוזאמקומען טויזענטער תלמידים פון די קאשויער ישיבה אין לויף פון צענדליגע יארן, זיך ווידער טרעפן אינאיינעם בשבת אחים, און ערוועקן אלטע זכרונות, שטיצענדיג דערביי די ישיבה הק' אהל רפאל קאשוי, לשמו ולזכרו פון הגה"ק מקאשוי זי"ע בעל ברכת שמים.
אין די יעצטיגע טעג איז באשטעטיגט געווארן די גענויע פלענער פארן מעמד גדול, וואס איז באשטימט געווארן אויף זונטאג פרשת תרומה, אור ליום כ"ו שבט, בליל הילולא קדישא פון הגה"ק רבי שאול בראך זצ"ל מקאשוי, רבו מובהק פונעם קאשויער רב הגה"ק בעל ברכת שמים זי"ע.
צו אקאמאדירן דעם ריזן ציבור וואס איז ערווארטעט, איז ארויסגעדינגען געווארן די ריזן זאל פון דוגאל גרינהאוז פלאזא, וואס איז איינער פון די גרויסע בנינים אין די באקאנטע נעיווי יארד קאמפלעקס אין ברוקלין, וואס איז גענוג גרויס צו דינען אלס אכסניא של תורה, און וועט ווערן אהערגעשטעלט פאר דעם פראכטפולן מעמד מיט גרויס כבוד.
אויפן טעכנישן פראנט האט די הנהלת הישיבה אויפגענומען די געלונגענע עסקנים פון "YF" פראדאקשענס, אונטער די געניטע פירערשאפט פון העסקן הנמרץ ר' יוחי פליישמאן הי"ו.
