היינט ווערט באקאנט די שווערע בשורה איבער די פטירה בשיבה טובה פון הרב ר' ישראל צבי גודמאן ע"ה, לאנגיעריגער רב פון די באקאנטע שוהל אין וואודרידזש, וועלכער איז נפטר געווארן אין עלטער פון פינף און ניינציג יאר, שליסנדיג א קאפיטל פון הרבצת התורה און רבנות פון איבער זיבעציג יאר.
הרב גודמאן איז געווען א באקאנטער פיגור אין אפסטעיט ניו יארק, זייענדיג פון די שטארק אקטיווע רבנים דורכאויס דעם גאנצן קיילעכיג יאר, וואס האט געשפילט א שטארקע ראלע אין אידישקייט אין אט די געגנטער.
מיט איבער זיבעציג יאר צוריק, ווען הרב גודמאן איז געווען אלט בלויז פינף און צוואנציג יאר, איז ער געווארן אויפגענומען אלס רב אין די אוהב שלום שוהל אין וואודרידזש, אין די פריערדיגע יארן האט ער געלערנט אין ישיבת תורה ודעת, און אין ישיבת רבינו יצחק אלחנן אין וואשינגטאן הייטס. אין א גאר יונגן עלטער האט ער שוין באקומען סמיכה, און איז געווארן אויפגענומען אלס רב אין וואודרידזש.
צענדליגע יארן האט ער משמש געווען ברבנות, געזאגט דרשות און פארגעלערנט שיעורים, אלעס אויף די אידישע שפראך. אזוי אויך פלעגט ער דינען אלס מרביץ תורה אין די היברו דעי סקול אין קייאמישא לעיק, וואו ער האט אריינגעבאקן תורה ויראת שמים אין די יונגע הערצער, וואס זענען נישט אויפגעוואקסן אין א שטארק אידישע אטמאספערע.
אין צוגאב צו זיין רבנות אין שוהל, האט ער אויך געדינט אלס טשאפלעין פון די לאקאלע ניו יארק סטעיט טורמע אין וואובארן, צענדליגע יארן פלעגט ער גיין בקביעות אין תפיסה און לערנען מיט די אידישע ארעסטאנטן, אסאך האט ער מקרב געווען צו אידישקייט און זיי פארוואנדלט אלס שומרי שבת, און מערקווירדיג איז די פאקט אז הרב גודמאן איז געווען דער לענגסט דינענדער ארבעטער אין די ניו יארק סטעיט רעגירונג, זייענדיג דער טשאפלען פאר איבער זעכציג יאר נאכאנאנד, און אויך דער עלטסטער ארבעטער אין די גאנצע רעגירונג אין ניו יארק סטעיט.
מיט ארום צוואנציג יאר צוריק ווען הרב גודמאן איז שוין געווען אויף די עלטערע יארן, האט ער אויפגענומען א נייער רב הרב הלל גראסמאן שליט"א, וועלכער איז משמש ברבנות אין וואודרידזש ביזן היינטיגן טאג, הרב גודמאן אליינס האט ווייטער אנגעהאלטן פארשידענע רבנות פונקציעס וואו דאס גיין אין תפיסה יעדע וואך לערנען מיט ארעסטאנטן. די לעצטערע יארן האט ער געוואוינט אין פלארידע, און היינט איז ער נפטר געווארן בשיבה טובה, אין הויכן עלטער פון פינף און ניינציג יאר.
די לוויה קומט פאר היינט מאנטאג אין פלארידע, און מארגן דינסטאג איינס אזייגער מיטאג ביי די גרויסע שוהל אין וואודרידזש, אויפן וועג קיין ארץ ישראל וואו ער וועט קומען לקבורה.
