די שטעטל לודמיר אין אוקראינע האט אין די יעצטיגע טעג ווידער אויפגעלעבט מיט א חסידישע אטמאספער, ווען פילע אידן זענען געקומען צו פארן פוקד זיין דעם ציון הק' פון הרה"ק רבי שלמה קארלינער זי"ע, אויף וועם צדיקים האבן עדות געזאגט אז ער האט די נשמה פון משיח בן יוסף, נאך וואס אין די לעצטערע יארן איז אויפגעבויעט געווארן א הערליכע הכנסת אורחים נעבן דעם ציון הק' מיט אלע נויטיגע איינריכטונגען.
צום הויכפונקט פון די הילולא קדישא איז געפראוועט געווארן א היסטארישע מעמד הכנסת ספר תורה, נאך גאנצע אכציג יאר וואס אזא מעמד איז נישט פארגעקומען אין דעם הייליגן שטאט, זינט עס איז פארוויסט געווארן פון אידישקייט נאך די צווייטע וועלט מלחמה ה"י. די ספר תורה איז אריינגעגעבן געווארן דורך הרה"ג ר' יעקב דוב בלייך שליט"א הויפט רב פון אוקראינע, און פילע אידן האבן אנטייל גענומען ביי דעם היסטארישן מעמד.
בראש המשתתפים האט זיך אנגעזעהן בהדרת כבוד כ"ק אדמו"ר מטשערנאביל שליט"א, וועלכער איז אנגעקומען אויף א מסע הקודש צו די קברי צדיקים, אינאיינעם מיט א שיינע קבוצה נגידים ותומכים, לטובת די נייע ביהמ"ד הגדול דחסידי טשערנאביל אין בני ברק. דער רבי שליט"א האט אפגעראכטן די ריקודין, און דערנאך באשיינט די צענטראלע סעודת מצוה און סעודת הילולא ברוב עם הדרת מלך.
