אמעריקעיר (Americare), א “האום העלט קעיר” פירמע וואס ווערט באצייכנט דורך פראפעסיאנאלן אין דער העלט-קעיר אינדוסטריע אלס די גרעסטע אין ניו יארק, האט דעם פארגאנגענעם דינסטאג נאכמיטאג געפייערט די גרענד אפענינג פון איר נייע אפיס אין ראקלענד קאונטי. די שמחה איז געפייערט געווארן מיט א “ריבאן קאטינג” צערעמאניע און א קביעת מזוזה אינעם נייעם לאקאציע אין ראקלענד.
ביים מעמד האבן זיך באטייליגט פילע ערוויילטע באאמטע, עסקנים, קאמיוניטי פירער און פארשטייער פון די פירנדע העלט-קעיר ארגאניזאציעס. מען האט געפייערט סיי די עפענונג פונעם נייעם אפיס און סיי דאס גרינדן פון א ספעציעלע אפטיילונג – וואס איז די ערשטע מאל אין די אינדוסטריע – געווידמעט צו סערווירן די היימישע קאמיוניטיס איבער גאנץ ניו יארק, אריינגערעכנט ראקלענד, סטעטען איילענד, ברוקלין, די פייוו טאונס, קרית יואל און די מאונטענס.
די נייע דעפארטמענט איז געגרינדעט געווארן אלס א לעזונג צו א שווערע פראבלעם וואס היימישע משפחות האבן געהאט פאר א לאנגע צייט, ווען זיי האבן געדארפט האום-קעיר סערוויסעס נאכן ווערן ארויסגעלאזט פון א שפיטאל אדער א רעהאביליטאציע צענטער.
אמעריקעיר שטעלט צו א ברייטן אויסוואל פון קורץ-טערמיניגע “האום העלט” סערוויסעס, ווי למשל וויזיטינג נוירסעס, פיזיקעל, אקיופעישאנעל, און ספיטש טעראפי, ווי אויך עידס (היים-געהילפן, HHA). אנדערש ווי פילע היימישע אגענטורן וואס פארנעמען זיך מיט לאנג-טערמיניגע הילף (CDPAP אדער LHCSA) אונטער מעדיקעיד, וואו עס קען נעמען א לענגערע צייט ביז מען באקומט די נויטיגע באשטעטיגונגען, קענען די דאזיגע סערוויסעס ווערן צוגעשטעלט גלייך נאכן פארלאזן א שפיטאל אדער רעהאביליטאציע צענטער, און ווערן באצאלט דורך “מעדיקעיר” פלענער, וואס פילע עלטערע אחב״י פארמאגן. די סערוויסעס ווערן געווענליך אויסגעשטעלט נאך פאר’ן ארויסגיין פון שפיטאל אדער רעהאב.
ביז היינט האבן אסאך היימישע משפחות געהאט גרויסע שוועריגקייטן ווען זיי האבן באקומען הילף פון אגענטורן וואס קענען נישט און פארשטייען נישט זייערע רעליגיעזע און קולטורעלע געברויכן. אין געוויסע פעלער האבן משפחות אפילו אינגאנצן אויפגעגעבן אויף די וויכטיגע סערוויסעס, וואס דאס קען האבן א שלעכטע השפעה אויפ’ן ערהוילונג פונעם פאציענט און פארגרעסערן די שאנסן אז מען זאל חלילה דארפן צוריקגיין אין שפיטאל.
די נייע אפטיילונג איז געשטעלט געווארן מיטן ציל אויסצופילן דעם חלל, דורך צונויפגיסן די איבער 40 יאר עקספיריענס פון “אמעריקעיר” אין די העלט-קעיר וועלט, אינאיינעם מיט א טיפע פארשטענדעניש צו די ספעציעלע געברויכן און סענסיטיוויטעטן פון דעם היימישן ציבור.
אזוי ווי אמעריקעיר שטייט שוין אין נאנטע פארבינדונג מיט אלע לאקאלע שפיטעלער און מיט א גרויסן טייל פון די רעהאביליטאציע צענטערן איבערן גאנצן ראיאן, קענען פאמיליעס וואס גרייטן זיך פאר א דיסטשארדזש זיך דירעקט פארבינדן מיט’ן ראקלענד אפיס פון אמעריקעיר. דער שטאב וועט זיך פארבינדן מיט’ן שפיטאל אדער רעהאב און קאארדינירן אלע נויטיגע צוגרייטונגען און סערוויסעס פאר’ן פאציענט.
נאך די ריבאן-קאטינג צערעמאניע, האבן די פירער פון אמעריקעיר געהאט די זכיה אריינצוגיין בקודש פנימה צום סקווערער רבי’ן שליט”א, וואו זיי האבן באקומען זיין ברכה פארן הצלחה פון די נייע אפטיילונג און איר הייליגע שליחות צו שטיין לימין אחינו בני ישראל מיט הילף און שטיצע. פאמיליעס וואס זוכן מער אינפארמאציע אדער הילף מיט’ן קאארדינירן די סערוויסעס, קענען זיך פארבינדן איבער סיי וואס מיט’ן אמעריקעיר “ראקלענד אפיס”, כדי די רעפערל זאל ווערן ארגאניזירט און אויפגעכאפט אלס א היימישע פאציענט.





































