אלפי תלמידי וחסידי סאטמאר איבער די גארער וועלט נעמען אויף אצינד די ביטערע בשורה, איבער די פטירה בשיבה טובה פון הרבני הנגיד המפורסם, הרב החסיד המפואר ר' ישראל דוב גאלדבערגער ע"ה, דער לעגענדארער תומך תורה ולומדיה, בונה ומקים עולמות של תורה איבער די גארער וועלט, און בפרט אין די מאסיווע סאטמארע אימפעריע וואו ער האט זיך געלאזט קאסטן אסטראנאמישע געלטער לבנות בתים לה' ולתורתו.
הרבני הנגיד ר' ישראל גאלדבערגער איז א נאמען וואס איז באקאנט ביי יעדן סאטמארער חסיד, א איד וואס האט געגאסן ריזיגע נדבות בכלל ובפרט, א איד וואס איז געשטאנען כחומה בצורה צו ממשיך זיין די לעכטיגע המשכה פון מורו ורבו הרה"ק מסאטמאר זי"ע, צו שטיצן זיינע מוסדות ביד רחבה וברוח נדיבה, און צוהעלפן אז דעם רבינ'ס אלוועלטליכע השפעה זאל האבן א שיינעם קיום.
ר' ישראל איז געווען פון די ערשטע תלמידים אין די סאטמארע מוסדות אין אמעריקע, און איז פון קינדווייז אן געווען אדוק ומקושר צו מורו ורבו דער סאטמארער רבי זי"ע מיט א פלאם פייער, ער האט זיך ארויסגעצויגן קיין קרית יואל און געווען פון די זקני ופארי החסידים, געטיילט גאר אסאך פאר אלע מוסדות הקדושים שלא יבוש המעין ולא יקצץ האילן.
איבער אלעם איז ארויסגעשטאנען זיינע אסטראנאמישע זכותים, אויפבויענדיג גיגאנטישע בנינים אדירים פאר ממלכת סאטמאר, תלמודי תורה און מיידל שולעס, בתי מדרשים און ישיבות, איבערהויפט די בנינים פון מוסדות סאטמאר אין קרית יואל, וואס ווערט טאקע נקראת על שמו בניני גאלדבערגער.
מיט בלויז עטליכע וואכן צוריק האט ער איבערראשט די עולם הצדקות אין סאטמאר, זייענדיג מנדב עטליכע מיליאן דאללער אפצוקויפן דעם זכות שם ההיכל פון ביהמ"ד הגדול דקהל יטב לב ד'סאטמאר אין וויליאמסבורג, בית מדרשו של רבי וואס גייט אצינד אריבער א רענאוואציע פראיעקט לפאר ולרומם את בית השם.
זייענדיג אין פלארידע אויף אפרוה איז ער ליידער אריינגענומען געווארן אין שפיטאל צוליב געזונטהייט קאמפליקאציעס, כ"ק אדמו"ר מסאטמאר שליט"א איז ספעציעל ארויסגעפארן אויף א קורצע באזוך קיין פלארידע צו מבקר חולה זיין ביי ר' ישראל, און אצינד האט ער צוריקגעגעבן זיין נשמה ליוצרה אין עלטער פון אכט און אכציג יאר, איבערלאזנדיג א שיינעם דור, קינדער און אייניקלעך וואס גייען אין זיינע שיינע וועגן, און אוצרות מלאים כל טוב מיט רוחניות'דיגע זכותים, וואס קומט אים אצינד אנטקעגן בעולם העליון, אינאיינעם מיט זיינע גרויסע רבי'ס וועם ער האט מחיה געווען די אלע יארן און ממשיך געווען פעולות צדיק לחיים.
די לוויה וועט פארקומען אין נארט מיאמי פלארידע וואו ר' ישראל איז נפטר געווארן, אין שפיץ פון מורו ורבו כ"ק אדמו"ר מסאטמאר שליט"א וועלכער האלט זיך אויף דארט אויף אפרוה אין די יעצטיגע וואכן. פון דארט וועט די מיטה געפירט ווערן קיין ניו יארק וואו ער וועט קומען לקבורה אויפן בית החיים אין קרית יואל.
יהא זכרו ברוך.
