אין די יעצטיגע טעג איז די הנהלה פון מוסדות עדת יראים וויען אין בארא פארק, אריינגעשפרינגען אין א מאסיווע פראיעקט פון הרחבת גבולי הקדושה, א פראיעקט אין ווערד פון פופצן מיליאן דאללער, אפצוקויפן און אהערשטעלן א פרישע פראכטפולע געביידע לשם ולתפארת, וואס וועט דינען אלס אכסניא של תורה ותפילה פאר די מיידל שולע בית יעקב דחסידי וויען אין שטאט.
די וויענער מוסדות אין בארא פארק בליהט און שיינט שוין צענדליגע יארן, תחת דגלו והדרכתו פון כ"ק אדמו"ר מוויען שליט"א, די ביז יעצטיגע געביידע פון די מיידל שולע "בית יעקב" וואס נעמט אריין זיבן שטאק, איז שוין לאנג אויסגעוואקסן איר געברויך, און די לחץ זו הדחק זעט זיך אן אויף טריט און שריט.
אצינד איז די הנהלת המוסדות אריינגעשפרינגען אין דעם מאלטי מיליאן דאללערדיגע פראיעקט אפצוקויפן א פרישע געביידע אויף די זעכציגסטע סטריט אין בארא פארק, צווישן די דרייצנטע און פערצנטע עוועניוס, וואס וועט ווערן אהערגעשטעלט אלס פאסיגע קביעות'דיגע אכסניא פאר נאך קלאסן, אין צוגאב צו די ביז יעצטיגע בנין בית יעקב. אין די פארלאפענע טעג האט כ"ק אדמו"ר מוויען שליט"א באזוכט אויפן שטח און געהערט א באריכט פון די עסקני המוסדות, ובברכתו ובעידודו האט מען אין א מזל'דיגע שעה אונטערגעשריבן דעם קאנטראקט צוצוברענגען גרויס הרחבת הדעת פאר די תלמידות.
