מיט עטוואס דערלייכטערונג נעמט כלל ישראל אויף די בשורה אז די רעגירונגס באאמטע אין מאלדאווע האבן ב"ה באפרייט די גוף פון האברך החשוב ר' עקיבא ראנד ע"ה, וועלכער איז ליידער טראגיש פארשניטן געווארן רח"ל אין א יונגן עלטער, זייענדיג פארמישט אין א שרעקליכע עקסידענט אין שטאט קעשינאוו אין מאלדאווע פארגאנגענעם מיטוואך.
ווי באריכטעט האבן די ארטיגע אויטאריטעטן נישט געוואלט ארויסגעבן דעם נפטר לקבורה, צוליב פארשידענע אויסריידן אז זיי דארפן אויספארשן די עקסידענט וכדו', מערערע עסקנים זענען געווארן אריינגעמישט אין די סיטואציע צו לייגן דרוק אויף די ארטיגע רעגירונג, אריינגערעכנט מדינת ישראל פאליטיקאנטן און עסקנים, און דער היימישער קאנגרעסמאן פון אמעריקע מייק לאולער וואס פארטרעט ראקלענד קאונטי, וועמענס פרוי שטאמט פון מאלדאווע, און צו די זעלבע צייט האט כ"ק אדמו"ר מטשערנאביל שליט"א אפעלירט צו כלל חסידיו און גאנץ כלל ישראל אז מען זאל מתפלל זיין די גוף זאל באפרייט ווערן ווי שנעלער.
דעם פרייטאג איז ב"ה אנגעקומען די בשורה אז די רעגירונג אין מאלדאווע האט באפרייט דעם נפטר, און נאך פארשידענע טעכנישע אויפהאלטונגען דורכאויס פרייטאג נאכמיטאג און מוצאי שבת ביז היינט נאכמיטאג ארטיגע זייגער, איז די מיטה געווארן אפגעפירט מיט א פליגער קיין ארץ ישראל לקבורה. די לוויה איז באשטימט אויף היינט זונטאג ביינאכט א פערטל צו צוועלף, ביים טשערנאבילער בית המדרש אויף רחוב תובל אין ירושלים עיה"ק, וואו דער חשובער נפטר איז געווען פון די גבאי הקהילה.
