די טויזענטער מתפללים אין די נאסטאלגישע זכרון משה שטיבלעך אין ירושלים עיה"ק זענען געכאפט געווארן אין איבערראשונג, ווען די עסקני הביהמ"ד האבן געמאלדן גרויסע פלענער צו פראכטפול איבערבויען די בנין בית המדרש, צוצוברענגען גרויס הרחבת הדעת פאר די צענדליגע טויזענטער אידן וואס דאווענען דארט כסדר.
דאס קומט נאכדעם וואס אין די לעצטערע חדשים איז אוועקגעשטעלט געווארן א ספעציעלער וועד הנהלה פון געטרייע רבנים און עסקנים וואס טראגן דעם עול פונעם ביהמ"ד, סיי ברוחניות און סיי בגשמיות, נאכפאלגענדיג די פטירה פונעם לאנגיעריגן רב און מרא דאתרא הרה"ג ר' אהרן פישער זצ"ל.
לויט די פלענער וואס מען האט אצינד פארעפנטליכט, וועט זיך אנהייבן די בוי ארבעט אויף די ערשטע שטאק, אין די צייט וואס די קביעות'דיגע מנינים און שיעורי תורה וועלן ווייטער פארקומען אויף די העכערע שטאקן, אין די זעלבע צייט וועט מען אויסגראבן נאך שטח צו קענען אהערשטעלן נאך נייע שטיבלעך אויף די אונטערשטע שטאק, און שפעטער ווען די בוי ארבעט אויפן ערשטן שטאק וועט פארענדיגט ווערן, וועט מען איבערבויען די העכערע שטאקן.
די וועד ההנהלה האט אין די יעצטיגע טעג געבעטן פונעם ציבור המתפללים אוועקצונעמען אלע פריוואטע חפצים פון די אונטערשטע שטאק, אויסער די איבערבוי פון די שטיבלעך וועט מען אויך אריינבויען נייע שטיגן צו קענען ארויפגיין און אראפגיין פון אינעווייניג, א זאך וואס איז נישט געווען ביז היינט.
