אידישע קינדער ווערן געבעטן צו דאווענען און מעורר זיין רחמי שמים, לרפואת הרב החסיד המפורסם ר' נפתלי הערש צאהלער הי"ו מגדולי העסקנים בדורינו, וועלכער האט ליידער געליטן היינט פון א הארץ אטאקע רח"ל, און איז אנגעוויזן אויף רחמי שמים מרובים.
הרב החסיד ר' נפתלי הערש איז שטארק באקאנט מיט זיינע פילע לייסטונגען פאר די אייניקלעך פון הרה"ק רבי ישעי'לע קערעסטירער זי"ע, נאך וואס ער אליינס האט געזעהן א גרויסע ישועה אין דעם געביט. הונדערטער טויזענטער דאללארן נעמט ער צוזאם יאר יערליך ארויסצוהעלפן די אייניקלעך פון הרה"ק רבי ישעי'לע זי"ע בעת שמחתם, און איז באקאנט מיט נאך פילע פעולות נשגבות פאר אידישע קינדער.
היינט פארמיטאג איז ער ליידער אוועקגעפאלן נאכן ליידן א שווערע הארץ אטאקע רח"ל, חברה הצלה האבן אים אין איילעניש אפגעפירט אין שפיטאל וואו ער גייט אריבער א קאמפליצירטע הארץ אפעראציע אין די יעצטיגע מינוטן, מיטן האפענונג אז ער זאל זיך ערהוילן און צוריקקומען לאיתנו הראשון.
אידן ווערן געבעטן צו מתפלל זיין לרפואתו השלימה והמהירה, נפתלי צבי בן רחל לאה בתוך שאר חולי ישראל, והן קל כביר לא ימאס תפילת הרבים.
