אנדערש ווי געווענליך ווען כ"ק אדמו"ר מפשעווארסק שליט"א פארט ארויס קיין פראנקרייך צו וויילן דארט אויף אפרוה אין לויף פון די זוממער וואכן, וועט דער רבי שליט"א דאס יאר ארויספארן קיין דייטשלאנד און זיך דארט אויפהאלטן פאר עטליכע וואכן, אין די צייט וואס עזרתו בקודש הרבנית הצדיקת מפשעווארסק תליט"א געפונט זיך דארט אין דייטשלאנד לצרכי רפואה.
די פשעווארסקער רעביצין תליט"א געפונט זיך אין א שפיטאל אין שטאט עסען אין דייטשלאנד שוין א שטיק צייט, פאר א לענגערע מעדיצינישע און ערהוילונגס פראצעדור, און אצינד האט דער רבי שליט"א אויסגעדרוקט רצון קדשו אז די נסיעה אויף אפרוה אין די זוממער סעזאן זאל דאס יאר זיין קיין דייטשלאנד, ער זאל קענען זיין נאנט צו די רעבעצין תליט"א אין די יעצטיגע תקופה.
דער רבי שליט"א וועט זיך ארויסלאזן אין וועג מארגן דינסטאג, און איז ערווארטעט צו פארבלייבן אין דייטשלאנד פאר כאטש פיר וואכן, א ספעציעלע אכסניא איז צוגעשטעלט געווארן פארן רבי'ן מיט אלע באדערפענישן, וואו עס וועלן געפראוועט ווערן די תפילות און טישן אינאיינעם מיט א ענגע מנין מקורבים און בני המשפחה.
נעכטן זונטאג אויפדערנאכט האט דער רבי באשיינט די שמחת הבר מצוה פון א אייניקל, אין ביהמ"ד הגדול פשעווארסק אין אנטווערפן. דערביי האט דער רבי אויפגעטרעטן מיט דברי פרידה פאר די חסידים, זאגענדיג אז עס ווערט געברענגט אין חז"ל מען זאל זיך געזעגענען בדבר הלכה, און דאס וואס מ'פירט זיך צו זאגן "זייטס געזונט", איז שוין א דבר הלכה, וויבאלד א מענטש איז מחויב צו טון פעולות צו זיין געזונט.
