יעצט ביינאכט אין ארץ ישראל איז באשטעטיגט געווארן די פלענער פאר א גרויסארטיגע עצרת מחאה אדירה וואס וועט פארקומען דורך אלפי חסידי צאנז, נאך וואס אין די לעצטערע טעג זענען צוויי צאנזער חסידים, א בחור און א אינגערמאן, ארעסטירט געווארן פארן איינציגן זינד פון זיך נישט שטעלן צום ציוניסטישן מיליטער.
בהוראת הקודש פון כ"ק אדמו"ר מצאנז שליט"א האבן די רבני ועסקני הקהילה זיך צוזאמגעזעצט אויף א דריגענדע אסיפה, וואו מען האט דורכגעטון בכובד ראש פארשידענע תכסיסי מלחמה וויאזוי צו לוחם זיין כדת של תורה, זיך אננעמען פאר כבוד שמים און מחזק זיין די אסירי ציון.
אצינד איז באשטעטיגט געווארן די פלענער פאר א גרויסע מעמד עצרת מחאה וואס וועט פארקומען מארגן נאכמיטאג, די מחאה וועט זיין אין פארעם פון א פאראייניגטע מארש, ווען טויזענטער חסידי צאנז וועלן ארויסגיין צופיס פון שטאט נתניה, און גיין דעם לאנגן וועג פון א שעה און א האלב ביז די מיליטערישע טורמע נומער צען, א מחאה וואס וועט אפקלינגען אויף א הילכיגן פארנעם אויף די ארטיגע גאסן, און שיקן עמערס חיזוק פאר די אסירי ציון וואס שמאכטן דארט אין טורמע.
די גענויע פלענער ווערן אויסגעארבעט אצינד דורך די עסקנים, איידערן ארויסגיין אויפן לאנגן וועג וועט מען פארטיילן ספעציעלע קונטרסים מיט פרקי תהלים און תפילות, און דורכאויס דעם גאנצן וועג ביי עטליכע סטאנציעס וועט זיין צוגעשטעלט קאלטע טרינקען זיך צו דערכאפן דאס הארץ.
