א שיינע מעמד איז פארגעקומען נעכטן זונטאג פרשת ואתחנן, בביתו נאוה קודש פון כ"ק אדמו"ר מוויזניץ שליט"א לרפו"ש אין מושב אורה נעבן ירושלים, וואו עס האבן זיך פארזאמלט א שיינע קבוצה חסידי וויזניץ וואס האבן זיך לעצטנס אריבערגעצויגן צו די בליענדע חסידישע ישוב אין עמנואל, און דערביי איז פארגעקומען די מעמד קריאת השם פאר די נייע וויזניצע קהילה דארט אין עמנואל.
די צאל חסידי וויזניץ אין עמנואל איז שטארק געוואקסן בליעה"ר, און אצינד איז געקומען צו די צייט אוועקצושטעלן די קהילה אויף א שטארקן יסוד, און געבן א נאמען פאר די קהילה נאך איינער פון די פריערדיגע צדיקים אין די וויזניצער דינאסטיע, ווי איינגעפירט אין אלע וויזניצע קהילות.
דער רבי שליט"א האט אויסגעדרוקט רצון קדשו צו רופן דעם נייעם קהילה מיטן נאמען "אמרי אליעזר", על שם האחים הקדושים לבית וויזניץ, כ"ק אדמו"ר הרה"ק בעל אמרי חיים מוויזניץ זצ"ל, און זיין ברודער כ"ק אדמו"ר הרה"ק בעל דמשק אליעזר מוויזניץ זצ"ל, וועלכער האט ליידער נישט איבערגעלאזט קיין דורות. פון ביידע רבי'ס האט מען שוין געגעבן נעמען פאר וויזניצע קהילות איבער די וועלט, און אצינד האט דער רבי אויסגעדרוקט רצון קדשו צוזאמצושטעלן די נעמען פון ביידע צדיקים אויף די נייע קהילה אין עמנואל.
ביים מעמד האט דער רבי שליט"א גערעדט בשבחם פון די בני הקהילה אין עמנואל, און דערנאך האט אויפגעטרעטן הרה"ג ר' שלמה קליין שליט"א רב דקהל חסידים אין עמנואל, און מען האט געזינגען ניגוני גאולה שטייענדיג אין די ניין טעג.
דערביי איז פארגעקומען די מעמד ראשית הגז, נאך וואס די חברי הקהילה האבן געקויפט עטליכע ציגן און מזכה געווען דעם רבי'ן מיט די זעלטענע מצוה. די אינגעלייט האבן אפגעשוירן די וואל און עס געברענגט פארן רבי'ן, וועלכער האט מיט גרויס התרגשות מקיים געווען די זעלטענע מצוה נאכן דורכטון די פרטי ההלכה, דער רבי האט איבערגעגעבן די וואל פארן משמש בקודש הרב החסיד ר' יהושע ברוך הכהן פאקשער הי"ו, זון פון הגה"צ ר' מענדיל פאקשער זצ"ל אב"ד וויזניץ אלעד.
