המוני חסידים ואנשי מעשה גרייטן זיך מיטצוהאלטן די געהויבענע מעמד סעודת הודאה בחצר הקודש סקולען, שטייענדיג שוין געציילטע טעג אפגערוקט פונעם יום ההודאה מוצאי שבת נחמו, ווען אידישע קינדער דאנקן און לויבן דעם אויבערשטן אויף די גרויסע חסדים, מיט די נס ההצלה ווען צדיקי בית סקולען זצ"ל זענען געראטעוועט געווארן מגיא צלמות אינעם ווייטן רוסלאנד.
די ברידער כ"ק האדמורי"ם מסקולען און ישועת יעקב סקולען שליט"א וועלן דאס יאר ווידער פראווענען דעם סעודת הודאה אינאיינעם בשבת אחים גם יחד, נאך וואס פארגאנגענע יאר איז די סעודת הודאה אין שפיץ פון די ברידער האדמורי"ם פארגעקומען אויף א קלענערן פארמאט שטייענדיג נאך בשנת האבילות נאכן הסתלקות פון זייער גרויסן פאטער כ"ק אדמו"ר הרה"ק מסקולען זצ"ל.
היי יאר וועט די גרויסע סעודת הודאה פארקומען אויף פיל א גרעסערע פארנעם בתופים ובמחולות, און פאר דעם צוועק איז ארויסגעדינגען געווארן די פראכטפולע עטרת גאלדא זאלן אין בארא פארק, צו קענען אקאמאדירן דעם ריזן ציבור וואס גרייטן זיך מיטצוהאלטן די געהויבענע מאמענטן פון הלל והודאה.
די יומא טבא וועט זיך שוין אנהייבן שבת קודש פרשת ואתחנן שבת נחמו, ווען די ברידער האדמורי"ם שליט"א וועלן פראווענען דעם שבת אינאיינעם בצוותא חדא אינעם סקולענער הויף, במקום שהתפללו אבותיהם צדיקי בית סקולען זצ"ל, מטעם די וועד האש"ל בחצר הקודש סקולען ווערט צוגערישט אש"ל מלא פאר די פילע געסט וואס וועלן קומען מיטהאלטן דעם געהויבענעם שבת.
