היינט צופרי האט אויסגעבראכן א העלישע פייער אין די באקאנטע אגרי סטאר פלענט אין פאסטוויל אייאווע, א פארנומענע פלענט וואו מען שעכט כשר פלייש פאר אידישע קינדער, און איז שטארק באקאנט ביי חרדישע אידן אין ניו יארק נאך וואס די בית השחיטה המהודרת אין קרית יואל באנוצט זיך מיט דעם פלענט צוצושטעלן כשר פלייש פאר יראים ושלמים.
די אגרי סטאר פלענט וועלכער ווערט פאררעכנט אלס די גרעסטע אידישע בית השחיטה אין די פאראייניגטע שטאטן, שטייט היינט אונטער די אייגענטומערשאפט פון הרבני הנגיד ר' הערשל פריעדמאן הי"ו פון מאנטריאל קאנאדע, פון דארט ווערט צוגעשטעלט כשר פלייש פאר אידישע קינדער איבער די וועלט, און ווי דערמאנט ווערט די פלענט באנוצט דורך די באקאנטע מהודר'דיגע שחיטה אין קרית יואל, וואס שעכט דארט די בהמות גסות פאר אידישע קינדער יראים ושלמים חסידים ואנשי מעשה, אונטער די שטרענגע השגחה פון ביד"ץ קרית יואל, בפיקוחו הרמה פון כ"ק אדמו"ר מסאטמאר שליט"א.
די העלישע פייער וואס האט אויסגעבראכן אין איינער פון די געביידעס אין די בית השחיטה קאמפלעקס, האט איינגעהילט די גאנצע געביידע און שיקט א געדעכטע רויעך אויפן גאנצן ארום, די ארבעט ביים פלענט איז אפגעשטעלט אויף דערווייל, און עס איז נישט קלאר ווען מען וועט קענען צוריק אנהייבן די פראדוקציע, טראץ וואס די פייער איז נישט אין די געביידע וואס ווערט גענוצט פאר די שחיטה זעלבסט.
כ"ק אדמו"ר מסאטמאר שליט"א וועלכער האט זיך אויפגעהאלטן די לעצטע פאר וואכן אין בעטלהעם ניו העמפשער אויף אפרוה, איז ערווארטעט זיך אומצוקערן אהיים קיין ניו יארק דעם דאנערשטאג פרשת עקב הבעל"ט, לויטן פלאן האט דער רבי שליט"א געזאלט מאכן אן אפשטעל אונטערוועגנס אין פאסטוויל אייאווע צו באזוכן אין די בית השחיטה און געבן די השגחה, אבער יעצט מיט די העלישע פייער זענען די פלענער געווארן אפגערופן.
