די בחורי חמד תלמידי ישיבה גדולה אור החיים אין קרית טאהש, האבן אין די טעג אויפגענומען די פרייליכע בשורה, איבער א גרויסע מסע הקודש וואס ווערט געפלאנט דעם קומענדיגן ווינטער הבא עלינו לטובה, ווען כ"ק אדמו"ר מטאהש שליט"א וועט ארויספארן קיין אייראפע אינאיינעם מיט די תלמידי הישיבה, צו פוקד זיין די קברי צדיקים אין די אייראפעאישע לענדער, לקדושים אשר בארץ המה.
די פרייליכע בשורה איז געמאלדן געווארן נאך א ספעציעלע אסיפה בביתו נאוה קודש פון כ"ק אדמו"ר מטאהש שליט"א אינאיינעם מיט די חברי הנהלת הישיבה, וואו דער רבי שליט"א האט אויסגעדרוקט רצון קדשו ארויסצופארן אויף א נסיעה צו די מקומות הקדושים אינאיינעם מיט תלמידיו הקרוים בנים.
די מסע הקודש איז באשטימט אויף חודש אדר תשפ"ז הבעל"ט, לקראת די יומא דהילולא קדישא פונעם רבן של ישראל דער הייליגער רבי ר' אלימלך פון ליזענסק זי"ע כ"א אדר, דערביי וועט דער רבי שליט"א אין א ערשטמאליגן פארנעם פוקד זיין דעם ציון הק' אינאיינעם מיט א ציבור אידן בחורי חמד תלמידי הישיבה. און אין די טעג ארום די יארצייט וועט מען מתפלל זיין ביי נאך קברי צדיקים אין די ארומיגע שטעט אין פוילין און ארום.
