חסידי ומעריצי בית צאנז זימיגראד זענען איינגעהילט אין פרייד, ווען אין די יעצטיגע טעג איז געמאלדן געווארן די פלענער איבער די אויפבוי פון צוויי נייע בתי מדרשים פאר כ"ק אדמו"ר מצאנז זימיגראד שליט"א, איינס אין בארא פארק וואו דער רבי שליט"א וואוינט שוין לאנגע יארן, און נאך איינס אין שכונת דברי חיים אין די בלומינגראוו געגנט אין קרית יואל, וואו דער רבי שליט"א האלט זיך אויף דורכאויס די זוממער וואכן און פילע שבתים דורכאויס די יאר.
די צאנז זימיגראדע בית המדרש אויף די פופציגסטע סטריט אין בארא פארק, וואו דער רבי שליט"א פראוועט שוין די עבודת הקודש לאנגע יארן, איז אין די לעצטע תקופה געווארן ענג צוליב דעם בליה און וואוקס פונעם ציבור, און מיטן הילף פון חשובע נדבנים און תומכים האט מען זיך אריינגעלאזט אין א מאסיווע פראיעקט אויפצובויען א שפאגל נייע בית המדרש פארן רבי'ן וואס וועט בעז"ה צוברענגען גרויס הרחבת הדעת פארן גאנצן ציבור.
אין די יעצטיגע טעג האט מען שוין אראפגעווארפן די אלטע געביידע, וואו עס איז אויך געווען מעון הקודש פונעם רבי'ן. דער רבי האט זיך אריבערגעצויגן וואוינען אויף צייטווייליג ביי איינער פון די נאנטע מקורבים, און די תפילות און טישן קומען פאר אין היכל ישיבת חתן סופר וואס געפונט זיך נישט ווייט.
אויסער די שטח וואו עס איז ביז יעצט געשטאנען די אלטע ביהמ"ד, האט די הנהלת הקהילה צוגעקויפט נאך א שטח דערנעבן צו קענען אויפבויען א גרעסערע בנין פארן ביהמ"ד, א היכל ביהמ"ד מיט דריי טויזענט סקווער פיס, א ספעציעלע דירה פארן רבי'ן, און אלע וויכטיגע צוגעהערן לרווחת הציבור.
אין די זעלבע צייט האבן די עסקני הקהילה אין קרית יואל אונטערגענומען א מאסיווע בוי פראיעקט אויפצובויען א שפאגל נייע ביהמ"ד פארן רבי'ן אין שכונת דברי חיים אין קרית יואל, די ביהמ"ד וועט געבויעט ווערן נעבן די יעצטיגע שוהל אויף זמיגראד לעין, און אויפן פלאץ פון די אלטע שוהל וועט געבויעט ווערן פרישע דירות פאר אידישע קינדער.
אין די יעצטיגע זוממער וואכן ווען דער רבי שליט"א האלט זיך אויף אין קרית יואל אויף אפרוה, איז דער רבי ארויס ביים שטח הבניה באטראכטן די פלענער, נאך וואס מען האט ב"ה ערהאלטן די נויטיגע פערמיטן, און מען גרייט זיך שוין אט אט אנצוהייבן די פאקטישע בוי ארבעט, לנצח על מלאכת בית ה'.
