אין א ערשטמאליגע ערשיינונג איז כ"ק אדמו"ר מבאבוב 45 שליט"א אנגעקומען די נאכט צום ציון הק' פון הרה"ק מסאטמאר זצ"ל אין קרית יואל, און מתפלל געווען לישועת הכלל והפרט שטייענדיג אין די טעג ארום די הילולא קדישא.
דער רבי שליט"א האלט זיך אויף די טעג אויף אפרוה אין די טשעסטער געגנט נעבן קרית יואל, און האט אויסגענוצט די געלעגנהייט צו מתפלל זיין ביים ציון הק' פון הרה"ק מסאטמאר זצ"ל, שטייענדיג א טאג נאך די הילולא קדישא וואס איז אויסגעפאלן דעם זונטאג כ"ו אב.
דער רבי שליט"א איז אנגעקומען צום ציון הק' מאנטאג נאכט נאך חצות הלילה, אינאיינעם מיט א ענגע צאל מקורבים, און געזאגט תהלים און מתפלל געווען א תפילה חרישית ביים ציון הק', איידער דער רבי האט זיך אומגעקערט לבית האכסניא אין טשעסטער.
פארגאנגענעם שבת קודש ביי שלש סעודות, וויילענדיג בגלילות קרית יואל באתריה דמר, שטייענדיג ערב די הילולא קדישא פון הרה"ק מסאטמאר זצ"ל, האט דער רבי שליט"א נאכגעזאגט דברי תורה פונעם בעל ההילולא, און דערציילט רייכע זכרונות וואס ער האט אליינס בייגעוואוינט ביים סאטמארער רבי'ן זצ"ל בהלו נרו עלי ראשינו.
