תלמידי וחסידי סאטמאר זענען איבערראשט געווארן מיט די פרייליכע מודעה, אז כ"ק אדמו"ר מסאטמאר שליט"א איז ממנה ומכתיר זיין יונגסטן זון הגה"צ ר' חנני' יו"ט ליפא טייטלבוים שליט"א אלס רב און אב בית דין פון די נייע פראכטפולע ביהמ"ד "ויואל משה" דקהל יטב לב ד'סאטמאר אין וויליאמסבורג, וואס ווערט פארענדיגט אין די טעג אין די פלאשינג אומגעגנט.
דער רב הגה"צ ר' ליפא שליט"א איז פקיע שמיה שוין לאנגע יארן מיט זיין הרבצת התורה פאר תלמידים, דינענדיג אלס ר"ם אין ישיבה גדולה תורה ויראה ד'סאטמאר, און חבר ההנהלה פון די מבצר התורה ישיבות קטנות ד'סאטמאר, דער רב שליט"א איז אן איידעם ביי הגה"צ רבי ברוך נתן האלבערשטאם שליט"א אבד"ק סאטמאר לאנדאן, און שטייט לימין הקודש פון אביו הגדול כ"ק אדמו"ר מסאטמאר שליט"א אין פילע הינזיכטן, בפרט מיטן ארויסגעבן לאור עולם די ספרים און חידושי תורה פונעם רבי'ן שליט"א.
אין די יעצטיגע טעג גרייט מען זיך צו פארענדיגן די בוי ארבעט ביים פראכטפולן בנין ביהמ"ד החדש דקהל יטב לב ד'סאטמאר אין די פלאשינג געגנט אין וויליאמסבורג, וואס וועט גערופן ווערן "ביהמ"ד ויואל משה", די ביהמ"ד וועט בעז"ה באנייעט ווערן אין די נאנטע וואכן, און אין די טעג איז באשטעטיגט געווארן אז דעם רבינ'ס יונגסטע זון הגה"צ ר' ליפא שליט"א ווערט אויפגענומען אלס רב אין די נייע ביהמ"ד.
אין די קומענדיגע טעג וועט בעז"ה פארקומען די מעמד ההכתרה און התמנות בביתו נאוה קודש פון כ"ק אדמו"ר מסאטמאר שליט"א, מיט די באטייליגונג פון די עסקני הקהילה און מתפללים אינעם נייעם ביהמ"ד.
