הונדערטער איינוואוינער אין דיעל ניו דזשערזי גרייטן זיך אין די טעג מיטצולעבן א געהויבענע שבת בצל הקודש פון כ"ק אדמו"ר משענדישוב שליט"א, וועלכער וועט בעז"ה פראווענען דעם קומענדיגן שבת קודש פרשת שופטים די ערשטע שבת אין חודש אלול אין דיעל, און משפיע זיין מזיו הודו והדרו אויף די ארטיגע אידן תושבי דיעל ניו דזשערזי.
דער רבי שליט"א וועט מופיע זיין בשערי העיר מארגן פרייטאג ערב שבת די צווייטע טאג ראש חודש, און וועט האבן די אכסניא אין שטוב פון הנגיד הנכבד ר' יונתן יוסף דגמי הי"ו אויף וועסטוואד עוועניו. דורכאויס שבת וועט דער רבי שליט"א פראווענען די תפילות ליל שבת אינעם גרויסן בית המדרש נעבן די אכסניא, שחרית שבת אינדערפרי אין ביהמ"ד אהל דן, און תפילת מנחה אין די לאקאלע דיעל תורה צענטער.
הונדערטער אידן תושבי העיר זענען ערווארטעט צו אנטייל נעמען ביים טיש פרייטאג צונאכטס, וואס דער רבי שליט"א וועט אפרעכטן כדרכו בקודש בשלהבת אש קודש, מיטן ראפשיצער פלאם בדרך אבותיו הקדושים. ווי באקאנט לייגט דער רבי שליט"א אריין א שטארקע עבודה ביי די טישן וואס פארציהט זיך פאר לאנגע שעות, מיט א געוואלדיגע התרוממות און התעלות בקדושת השבת.
די טיש פרייטאג צונאכטס וועט פארקומען אינעם בית המדרש נעבן די אכסניא וואס ווערט צוגערישט צו קענען אקאמאדירן דעם גרויסן ציבור וואס איז ערווארטעט זיך צו דערווארעמען לאורו הבהיר פונעם רבי'ן שליט"א. וכמעשהו בליל שבת קודש וועט דער רבי שליט"א פראווענען שלש סעודות בעידן רעוא דרעוין דארט אינעם בית המדרש, וואו עס איז ווידער ערווארטעט א גרויסן ציבור חסידים ואנשי מעשה, אויסנוצן די הויכע מינוטן זיך צוצוגרייטן בהכנה דרבה צו די הייליגע טעג הממשמשים ובאים.
דער רבי שליט"א וועט פארבלייבן אין דיעל פאר די נאכפאלגענדע טעג, מוצאי שבת קודש וועט געפראוועט ווערן א שיינע מלוה מלכה באנקעט לטובת מוסדותיו הקדושים, אין שטוב פון איינער פון די נאנטע מקורבים ביים רבי'ן מגדולי נגידי בית שענדישוב. זונטאג אינדערפרי וועט דער רבי דאווענען שחרית אינעם לאקאלן בית המדרש, און נאכן דאווענען וועט פארקומען א מעמד קבלת פנים לכבודו.
אין לויף פון די טעג וועלן די תושבי העיר האבן די זכיה אריינצוגיין אל הקודש פנימה, זיך מזכיר זיין בפו"פ להיזכר לטובה, ולהיפקד בדבר ישועה ורחמים, שטייענדיג אין די ימי הרחמים והרצון אין חודש אלול, און נהנה זיין עצה ותושיה.
