מיט גרויס פרייד האבן די הונדערטער תלמידים אין די בארימטע בריסקער ישיבה אין ירושלים מקבל פנים געווען היינט דעם ראש ישיבה הגאון הגדול רבי אברהם יהושע סאלאווייטשיק שליט"א, וועלכער האט זיך ב"ה צוריקגעקערט צום היכל הישיבה ממשיך צו זיין מיט זיין הרבצת התורה, נאכן זיך ערהוילן ב"ה פון א שווערע דורכגאנג אין געזונט.
דער ראש ישיבה איז ווי באקאנט אריבער א שווערע דורכגאנג די לעצטע פאר חדשים, נאך וואס מען האט דורכגעפירט א קאמפליצירטע אפעראציע אויפן הארץ, און עס האט זיך געשאפן פארשידענע קאמפליקאציעס וואס האט צוגעברענגט אז דער ראש ישיבה זאל אריינפאלן אין א קריטישע מצב ה"י. איבער די גאנצע וועלט האט מען מתפלל געווען לרפואתו, און איינגעריסן וועלטן ביים בורא כל עולמים, טראץ וואס די מצב האט אויסגעזעהן גאר שווער.
בחסדי ה' האט זיך דער ראש ישיבה ארויסגעדרייט פון דעם מצב סכנה, און צוביסלעך צוריקגעקומען צו די כוחות זיך ערהוילנדיג צוערשט אין שפיטאל און שפעטער אינדערהיים. מיט עטליכע וואכן צוריק האט דער ראש ישיבה שוין איבערגעגעבן א קורצע שיעור פאר א קבוצה תלמידים ביי זיך אין שטוב, און היינט מאנטאג צום אנהייב פון די פרישע אלול זמן איז דער ראש ישיבה אנגעקומען צום ערשטן מאל נאכן ערהוילונג צום בנין הישיבה.
אין די קומענדיגע תקופה וועט דער ראש ישיבה זיך אויפהאלטן אין א ספעציעלע דירה וואס איז געווארן איינגערישט אינעם בנין הישיבה, צו פארגרינגערן דאס קומען און גיין, און היינט מאנטאג האט דער ראש ישיבה פארגעלערנט דעם ערשטן שיעור פאר די הונדערטער תלמידים.
