א שיינע און פרייליכע שמחה איז פארגעקומען די וואך, ווען עס איז געשלאסן געווארן א שיינע תורה'דיגע/בעל הבית'ישע שידוך בבתי נדיבים בעם גאונים מפורסמים און תומכי תורה, די חתן איז א זון פון הרבני הנגיד המפורסם פה מפיק מרגליות הרב אהרן נאה שליט"א, און די כלה איז די עלטסטע טאכטער פון הרבני הנגיד בר אוריון ובר אבהן הרב משה מנחם קוגל שליט"א פון די חשובע תלמידי חכמים און תומכי תורה בעיר התורה לעיקוואד.
פון ביידע צדדים ווערט געצויגן א הערליכע יחוס, די חתן איז א אייניקל פון הרב החסיד המפורסם ר' מנחם דוב נאה שליט"א, משב"ק ביי כ"ק אדמו"ר מתולדות אהרן זצ"ל בעל דברי אמונה, א זון פון הרה"צ ר' יצחק נאה זצ"ל מחשובי חסידי סאטמאר און באקאנטער סופר סת"ם. אויך איז ער אן אייניקל פונעם באקאנטן משמח אלקים ואנשים מחשובי חסידי וויזניץ, הרה"ג המפורסם ר' יעקב מיללער שליט"א אבד"ק יארמא. ולמעלה בקודש איז ער אן אייניקל פון הגה"ק מטשאבא זצ"ל, און הגה"ק בעל משנת שכיר זצ"ל.
די כלה ציהט איר שיינעם יחוס צו גאר חשובע און געהויבענע אידן, דער אבי הכלה איז א זון פון הרב הגאון ר' ישעי' קוגל שליט"א מחשובי חסידי צאנז, ור"מ בישיבת ר' חיים בערלין, און אן איידעם ביי הרב הגאון ר' מיכאל יהודה ראטטענבערג שליט"א רב ביהמ"ד יד מרדכי אין לעיקוואד, ביי וועם די כלה איז די עלטסטע אייניקל. דער חשובער זיידע הרה"ג ר' מיכאל יהודה איז א זון פון הרבני הנגיד יוסף ראטטענבערג זצ"ל ראש הקהל דק"ק מחזיקי הדת אין אנטווערפן, וועלכער איז געווען באקאנט מיט זיין געוואלדיגע כח הצדקה וביתו בית וועד לחכמים. א אייניקל פון הגאון הגדול המפורסם רבי מרדכי ראטטענבערג זצ"ל אב"ד אנטווערפן.
דער חשובער זיידע הרה"ג ר' מיכאל יהודה ראטטענבערג שליט"א איז אן איידעם ביים באקאנטן נגיד ותומך תורה וואס איז נישט לאנג צוריק אוועק פון דער וועלט, הרבני הנגיד המפורסם בונה ומקים עולמות של תורה, הרב אברהם האלפערין ז"ל פון די וועסט סייד, מחשובי חסידי בית רוזין, יו"ר אגודת ישראל ויושב ראש וועד קרן השביעית. ר' אברהם איז געווען באקאנט איבער די גאנצע וועלט מיט זיינע ווייטגרייכנדע פעולות נשגבות, זייענדיג א זון פון הרב החסיד המפורסם ר' נחום יואל האלפערין ז"ל ממייסדי שכונת זכרון מאיר אין בני ברק, און פון די גאר נאנטע מקורבים ביים הייליגן חזון איש זי"ע.
דער גרויסער זיידע ר' אברהם איז געווען זייער נאנט מיט פילע גדולי הדור, און גענאסן א קירבה יתירה אלע יארן, די אלע זכותים וועלן זיכער מגין זיין און באגלייטן די חתן און כלה, זיי זאלן קענען אויפשטעלן א בית נאמן בישראל בשעה טובה ומוצלחת.
ביים שמחת האירוסין האט ספעציעל ארויסגעשיינט די פערזענליכע השתתפות פון כ"ק אדמו"ר מסאדיגורא ירושלים שליט"א, מיט וועם ביידע מחותנים האבן א נאנטע קשר, דער רבי האט ארומגערעדט איבער די גרויסקייט פון די יחוס, און ווארעם געוואונטשן די חתן און מחותנים מיט פיל נחת ותענוג דקדושה.
