בחצר הקודש סקולען איז אין די יעצטיגע טעג באשטעטיגט געווארן די גענויע פלענער פאר א גרויסע מעמד הכנסת ספר תורה, וואס וועט בעז"ה געפראוועט ווערן דעם קומענדיגן חול המועד סוכות במעמד קהל רב חסידים ואנשי מעשה.
שטייענדיג צוויי יאר נאכן הסתלקות פון כ"ק אדמו"ר מסקולען זצ"ל בעל ישועת יעקב, איז פארענדיגט געווארן די מהודר'דיגע ספר תורה וואס איז געשריבן געווארן דורך די חברי הקהילה, לזכר נשמתו הטהורה פונעם רבי'ן זצ"ל, די הייליגע ספר תורה וואס וועט ווערן אריינגעפירט לבית מדרשו של רבי, די נאסטאלגישע סקולענער בית המדרש אין בארא פארק, באותו מקום וואו דער רבי זצ"ל האט געפראוועט די עבודת הקודש בימי כהונתו, און ממשיך געווען דעם הייליגן עבודה פון אביו הגדול כ"ק אדמו"ר מסקולען זצ"ל בעל מאור ישראל.
די גרויסארטיגע מעמד הכנסת ספר תורה וואס וועט בעז"ה פארקומען אין שפיץ פון בנו כ"ק אדמו"ר מסקולען שליט"א, און בנו כ"ק אדמו"ר מישועת יעקב סקולען שליט"א, איז באשטימט אויף קומענדיגן מאנטאג די ערשטע טאג חול המועד סוכות, יומא דאושפיזא דיעקב, די אושפיזין פונעם רבי'ן זצ"ל בעל ישועת יעקב. לויט די ערשטע פלענער וועט די פרייליכע ריקודים ווערן אפגעראכטן אינעם סוכה הגדולה פארנט פון ביהמ"ד אויף די פיר און פופציגסטע סטריט, אינאיינעם מיטן מעמד שמחת בית השואבה בתופים ובמחולות.
