אידישע קינדער איבער די גאנצע וועלט נעמען אויף מיט אן אומבאשרייבליכע פרייד און דערלייכטערונג די נייעס פון איראק, אז דער בחור בנימין בן לימור כאסין וועלכער האט געשמאכטעט אין א ארטיגע טורמע די לעצטע פאר יאר איז היינט באפרייט געווארן פון טורמע, און ער וועט זיך קענען צוריק פאראייניגן מיט זיין פאמיליע אין ארץ ישראל.
די נאמען בנימין בן לימור איז שטארק באקאנט געווארן ביי כלל ישראל מיט איבער א יאר צוריק, נאך וואס עס האט געדראעט אויף אים טויט שטראף, און מיטן הילף פון כלל ישראל מיט תפילות און געלט האט מען בסייעתא דשמיא אנולירט דעם שטראף און עס אויסגעטוישט פאר א מינימאלע טורמע טערמין.
זינט די פארמאלע סולכא וואס איז פארגעקומען פארגאנגענעם חודש חשון, ווען די פאמיליע וואס האט אים אנגעקלאגט האט מוחל געווען די שטראף נאכן ערהאלטן א פערטל מיליאן דאללער, איז ווייטער אנגעגאנגען העפטיגע עסקנות און שתדלנות צו קענען פולקאם באפרייען בנימין פון די טרויעריג בארימטע איראקער טורמע, און היינט איז ב"ה אנגעקומען די פרייליכע בשורה אז ער איז ווירקליך באפרייט געווארן פון טורמע.
בנימין איז געווארן אפגעווארט דורך זיין לויער אלען לאווי, און ער איז ערווארטעט ארויסצופארן פון איראק קיין ארץ ישראל וואו ער וועט זיך קענען פאראייניגן מיט זיין פאמיליע בחסדי ה'.
