א שענדליכע וואנדאליזם אטאקע איז פארגעקומען די נאכט ביים אלטן און היסטארישן בית החיים אין שטאט אלכסנדר אין פוילין, במקום מנוחת קדשם פון די הייליגע צדיקים אדמור"י בית אלכסנדר, הרה"ק רבי יחיאל האדמו"ר הזקן מאלכסנדר זי"ע, הרה"ק בעל ישמח ישראל מאלכסנדר זי"ע, הרה"ק בעל תפארת שמואל מאלכסנדר זי"ע, און נאך צדיקים וקדושים און פילע אידן חסידים ואנשי מעשה.
אידישע קינדער וואס זענען אנגעקומען היינט צופרי מתפלל צו זיין ביי די קברי צדיקים אויפן פלאץ, זענען געווארן אויפגעשוידערט צו זעהן ווי וואנדאלן האבן אנגעפירקלט שענדליכע פירקלערייען און אנטיסעמיטישע גראפיטי אויף די צוים וואס נעמט ארום די בית החיים. און ווי עס שטעלט זיך ארויס האט זיך עס אפגעשפילט דורכאויס די פארלאפענע נאכט ווען בייזוויליגע פארשוינען האבן געוואלט פארשוועכן דאס פלאץ.
די הנהלה פון הכנסת אורחים אלכסנדר האט זיך באלד פארבינדן מיט די ארטיגע פאליציי באאמטע און שטאטישע אויטאריטעטן, און האבן אריינגעגעבן א קלאגע צו די פאליציי. א העפטיגע אויספארשונג איז אקטיוו אצינד מיטן האפענונג צו כאפן די פארברעכער און זיי ברענגען צו פאראנטווארטליכקייט, און די עסקנים ארבעטן צו אפרייניגן דעם ארט למען כבוד צדיקים הקודמים.
