אין די יעצטיגע טעג גייט אן א העפטיגע בוי פראיעקט ביים חב"ד הויפטקוואטיר אויף 770 איסטערן פארקוועי אין קראון הייטס, ווען עס ווערט אויפגעבויעט א נייע פראכטפולע היכל התורה מיט הונדערטער זיץ פלעצער, צו לינדערן די געדרענג וואס הערשט אינעם צענטראלן היכל בית המדרש אין 770, צוצוברענגען נאך פלאץ וואו צו קענען לערנען מיט הרחבת הדעת.
די רעדע איז פון די אלטע כולל געביידע ביים ווינקל פון יוניאן סטריט און קינגסטאן עוועניו, וואס געפונט זיך הארט נעבן די גרויסע בנין פון 770 איסטערן פארקוועי, און איז אין די לעצטערע יארן געווען ארויס פון באנוץ נאכפאלגענדיג א שווערע שריפה. אצינד האט מען זיך גענומען צו די ארבעט אהערצושטעלן דעם בנין אלס א גרויסע היכל התורה מיט מער ווי דריי הונדערט זיץ פלעצער, וואס וועט גענוצט ווערן דורכאויס די יאר, מיטן האפענונג אז עס זאל שוין זיין גרייט אין די נאנטע טעג פאר די יערליכע כינוס השלוחים, ווען עס קומען צו פארן קיין קראון הייטס די טויזענטער שלוחי חב"ד פון איבער די גאנצע וועלט.
די בוי ארבעט ווערט דורכגעפירט מיטן פלאן צו קענען באהעפטן דעם נייעם היכל מיט די עקזיסטירנדע צענטראלע ביהמ"ד אין 770, דעריבער בויעט מען עס ביים זעלבן הייעך און הארט נעבן די צענטראלע געביידע, צו קענען מרחיב זיין די גבולי הקדושה אין די קומענדיגע תקופה.
