אלפי חסידי סאטמאר לומדי מסגרת "זכרו", וואס גרייטן זיך שוין אט אט לברך על המוגמר און מסיים זיין גאנץ ש"ס אין א מזל'דיגע שעה, האבן אויפגענומען מיט גרויס איבערראשונג די נייעס, אז די גרויסארטיגע מעמד סיום הש"ס וואס איז באשטימט געווארן אויף קומענדיגן "פורים קטן", זונטאג פרשת כי תשא תשפ"ז, וועט פארקומען אין די גיגאנטישע פעסטונג "נעסאו קאלאסיום" אין ניו יארק
נאנט צו דרייצן יאר איז שוין פארביי פון ווען די סדר הלימוד איז געגרינדעט געווארן דורך כ"ק אדמו"ר מסאטמאר שליט"א, און האט אין די לעצטערע יארן פאראייניגט טויזענטער חסידים אויף א טעגליכע פארנעם, מיט נאכאנאנדע בחינות און שיעורי תורה וואס האט שטארק געהויבן דעם כח התורה אינערהאלב קהל יטב לב ד'סאטמאר. דורכאויס די יארן האט מען אויך צוגעלייגט נאך מסגרת'ן אינערהאלב חבורת זכרו, ווי די חבורה פון "זכרו הלכה" וואו מען איז עוסק אין לימוד הלכה מדי יום ביומו.
שטייענדיג שוין נענטער ווי ווייטער צום גליקליכן מאמענט ווען די טויזענטער לומדים וועלן מסיים זיין גאנץ ש"ס, ווען מיט א האלבע יאר צוריק איז שוין באשטעטיגט געווארן די ערשטע פלענער איבער די גרויסארטיגע חגיגה, אז עס וועט פארקומען אין דעם פרייליכן טאג פון פורים קטן, זונטאג פרשת כי תשא י"ד אדר א' תשפ"ז, איז אין די טעג באשטעטיגט געווארן אז די גרויסארטיגע חגיגה לכבודה של תורה וועט פארקומען אין די גיגאנטישע פעסטונג "נעסאו קאלאסיום" אין ניו יארק, וואס פארמאגט טויזענטער פלעצער צו קענען אקאמאדירן דעם ריזן ציבור הלומדים.
אין אן ערשטמאליגע ערשיינונג לכבודה של תורה, וועט די גיגאנטישע זאל ווערן אהערגעשטעלט מיט טישן צו קענען סערווירן א רייכע סעודה כיד המלך לגומרה של תורה, א סוויטע העפטיגע עסקנים ארבעטן די טעג צו פארזיכערן די מאקסימום סוקסעס פון די נאכט לרומם קרן התורה ולומדיה.
