בחצר הקודש סערט וויזניץ ווערט געמאלדן אין די טעג איבער א ספעציעלע שבת וואס כ"ק אדמו"ר מסערט וויזניץ שליט"א וועט פראווענען אינאיינעם מיט די הונדערטער בחורי החסידות, ווען אין א ערשטמאליגע פארנעם וועט דער רבי שליט"א ארויספארן מיט די בחורים און פארברענגען מיט זיי בתורה וחסידות, און זיי דערהייבן ביי די לעכטיגע תפילות און טישן כשהמלך בשדה.
דאס קומט נאכדעם וואס דער רבי שליט"א האט אויסגעדרוקט רצון קדשו צו פראווענען א שבת אינאיינעם מיט די בחורי הישיבות, וואס זאל ווערן אפגעראכטן מחוץ לעיר אויף א אייגענארטיגע פארנעם. צו דעם צוועק איז ארויסגעדינגען געווארן די תומר דבורה קאמפלעקס אין עיה"ק צפת, וואס וועט ווערן צוגערישט צו קענען אקאמאדירן די הונדערטער בחורי הישיבות דחסידי סערט וויזניץ, לעשות את השבת בצילא דמהימנותא בדיבוק חברים, בשבת אחים גם יחד.
די שבת בצל כנפיך יחסיון וועט פארקומען קומענדיגן שבת קודש פרשת ויחי שבת חזק, און וועט באשיינט ווערן דורך חשובע מגידים און בעלי דרשנים, ובראשם דער רועה נאמן כ"ק אדמו"ר מסערט וויזניץ שליט"א וועלכער וועט אפרעכטן די תפילות און טישן ספעציעל מיט די בחורים.
