יעצט ביינאכט ווערט אויפגענומען די ביטערע בשורה פון די מאימאנידיס שפיטאל, איבער די הסתלקות לשמי מרום פון האי גאון וצדיק שריד לדור דעה, מזקני רבני וגדולי הדור, כ"ק הגה"צ רבי יקותיאל יהודה מייזליש זכר צדיק לברכה, גאב"ד קהל יראים סיגעיט, וועלכער איז יעצט ביינאכט נפטר געווארן אין טיפן עלטער פון פיר און ניינציג יאר.
אבידה היא שאין לה תמורה, שרייט זיך ארויס פון איבעראל, ווען עס איז אוועקגעריסן געווארן א פארצייטישער גדול, א הייליגער רב וואס האט נאך פארבינדן די היינטיגע אידנטום מיט די פארצייטישע גדולי הדור פון דער אלטער היים, א איד וואס האט משפיע געווען פאר טויזענטער אידן תורה וחסידות, געפירט א שטאטישע קהילה ביד רמה ווי אין די אמאליגע דורות.
דער סיגעיטער רב הגה"צ רבי יקותיאל יהודה מייזליש זצ"ל, איז געווען א זון פון הגה"צ רבי צבי הירש מייזליש זכר צדיק לברכה ווייטצענער רב, א אייניקל פון הייליגע צדיקים וקדושים לבית אוהעל, סיגעיט, צאנז, באבוב, און נאך פילע קדושי עליון וואס האבן פארשיינט די וועלט מיט זייער צדקות און גדלות בתורה והוראה.
געבוירן איז ער אין יאר תר"צ אין שטאט ווייטצען, וואו זיין פאטער האט געדינט אלס רב, ער האט געטראגן דעם נאמען יקותיאל יהודה נאך זיין גרויסן זיידן דער הייליגער ייטב לב פון סיגעט זי"ע. אלס בחור האט ער געלערנט אין די בארימטע ישיבה אין אוהעל, בצל הקודש פון זיין זיידן דער בנין דוד זי"ע, בעפאר די שרעקליכע וועלט מלחמה האט אינוואדירט אונגארן און צוגענומען יעדעס ביסל רואיגקייט.
דער רב איז געווען א אוד מוצל מאש, ער האט דורכגעמאכט ביטערע תקופות ביים צווייטן וועלט קריג, זייענדיג פארשמאכטעט אין אוישוויץ אין די ערגסטע לאגערן, אלע יארן פלעגט ער דערציילן די נסים ונפלאות וואס ער האט דאן בייגעוואוינט, וויאזוי ער האט זוכה געווען ארויסצוקומען לעבעדיג און ווידער אויפבליען דעם הערליכן דור.
צענדליגע יארן האט ער משמש געווען אלס רב אין די צענטראלע בית המדרש קהל יראים אין סיגעיט, פארגעלערנט שיעורים און מדריך געווען די שטאטישע איינוואוינער בהלכה פסוקה, מיט זיין רייכע שפראך האט ער דערציילט לעכטיגע זכרונות פון אמאל און ערשטהאנטיגע סיפורי צדיקים, און אריינגעשיינט גרויסע ליכטיגקייט אין די אלע אידן וואס האבן זיך מתחמם געווען לאורו הגדול.
אין די לעצטערע יארן איז דער רב ליידער געווען אפגעשוואכט, איבערהויפט אין די לעצטע פאר וואכן ווען זיין מצב הבריאות האט זיך שטארק פארערגערט, און פילע אידן האבן מתפלל געווען לרפואתו. היינט נאכמיטאג האבן זיך צוזאמגענומען ארום דעם רב די קינדער און אייניקלעך צו זאגן פסוקי יחוד, און יעצט ביינאכט איז דער רב נתבקש געווארן לישיבה של מעלה בשיבה טובה. די לוויה וועט פארקומען צען אזייגער פארמיטאג בהיכל בית מדרשו קהל יראים אין סיגעיט, וואו מען וועט הערן דברי הספד קינה ונהי מפי בני משפחתו מגידים מפורסמים, פון דארט וועט די מיטה געפירט ווערן צום סאטמארער בית החיים אין ניו דזשערזי, וואו ער וועט קומען לקבורה נעבן קברי אבותיו.
דער רב זצ"ל לאזט איבער א הערליכע דור בליעה"ר, קינדער און אייניקלעך רבנן ותלמידיהון, עלף קינדער אלע גאר חשובע רבנים ואדמורי"ם, די זיהן הגה"צ אבד"ק לימינוב שליט"א, הגה"צ ר' דוד דוב מייזליש רב הצעיר אין קהל יראים סיגעיט, הגה"צ ר' יוסף משה מייזליש שליט"א אב"ד לאסק, הגה"צ ר' פנחס מרדכי מייזליש שליט"א דומ"ץ קהל יראים סיגעיט, און הגה"צ ר' שמעון זאב מייזליש שליט"א רב ביהמ"ד ישמח משה קרית יואל איידעם ביי כ"ק אדמו"ר מסאטמאר שליט"א.
די איידימער זענען הגה"צ ר' יעקב אלי' אונסדארפער שליט"א רב דקהל מתיבתא ראשית חכמה אין מאנטריאל, הגה"צ ר' יחזקאל מייזליש שליט"א אב"ד אוהעל וויליאמסבורג, הגה"צ ר' יחזקאל הורוויץ שליט"א אב"ד קנין תורה שטראסבורג, כ"ק אדמו"ר מדושינסקיא שליט"א, הגה"צ ר' אשר אנשיל שעהר שליט"א אב"ד קלעסאן, און הגה"צ ר' אברהם יודא לעוו שליט"א גאב"ד תפארת אליעזר.
